އިޒްރޭލު ޕާސްޕޯޓުގައި މީހުން ރާއްޖެ އެތެރެވުން މަނާކުރަން ގާނޫނޫ އިސްލާހުކުރަން ސަރުކާރުންވަނީ ނިންމާފަ އެވެ. އިޒްރާއީލް ޕާސްޕޯޓް ބޭންކުރުމުގެ މަސައްކަތް ފަށަން ސަރުކާރުން މި ނިންމީ އިޒްރޭލު ޕާސްޕޯޓުގައި މީހުން ރާއްޖެ އެތެރެވުން މަނާ ނުކުރާތީ އެކަމާއި ދެކޮޅަށް ރައީސް އޮފީސް ކައިރީ އަޑުވެސް އުފުލާފައިވަނިކޮށެވެ.
ފަލަސްތީނުގެ މައްސަލާގައި ރާއްޖެއިން އަޅަން ގަސްތުކުރާ ފިޔަވަޅުތަކާއި ގުޅިގެން ވަޒީރުން މަޖިލީހުން ނިންމި ނިންމުން ހާމަކުރައްވަމުން ދާހިލީ ވަޒީރު އަލީ އިހްސާން ވިދާޅުވީ އިޒްރޭލުގެ ޕާސްޕޯޓްގައި ރާއްޖެއަށް އެތެރެވުން ހުއްޓުވުމަށް ގާނޫނުތަކަށް ގެންނަން ޖެހޭ އިސްލާހުތައް ގެނައުމަށް ނިންމާފައިވާކަމަށެވެ. އެކަން ފާހަގަ ކުރައްވައި ރައީސް މައުމޫން އެކްސްގައި މިއަދުވަނީ ސަރުކާރަށް މަރުހަބާ ވިދާޅުވެފަ އެވެ
އިޒްރޭލުން ފަސްލަތީނުގެ ބިންތައް ފޭރިގަނެ، އެ ގައުމުގެ ރައްޔިތުންނާ ދެކޮޅަށް ހިންގަމުންދާ ގަތުލު އާންމާ ގުޅިގެން، އިޒްރޭލުގެ ފަތުރުވެރިން ރާއްޖެ އައުން މަނާކޮށް އިޒްރޭލުގެ އުފެއްދުންތައް ރާއްޖެ ގެނައުން މަނާކުރަން ގޮވާލާ ގަރާރެއް ރައްޔިތުންގެ މަޖިލީހުން ފާސްކުރީ މިދިޔަ އޭޕްރިލް މަހުގެ ފުރަތަމަ ދުވަހު އެވެ. އެ ނިންމުން އޮތީ ރައީސް އޮފީހަށް ފޮނުވާފަ އެވެ.
އިޒްރޭލުގެ ޕާސްޕޯޓްގައި ރާއްޖެއަށް އެތެރެވުން ހުއްޓުވުމަށް ގާނޫނުތަކަށް ގެންނަން ޖެހޭ އިސްލާހުތައް ގެނައުމަށް ވަޒީރުން މަޖލީހުގެ ހާއްސަ ކޮމެޓީއެއްވެސް ސަރުކާރުންވަނީ އެކުލަވާލާފަ އެވެ. އެ ކޮމެޓީގައި ދާހިލީ ވަޒީރު އަލީ އިހްސާންއާއެކު ދެން ހިމެނިވަޑައިގަންނަވަނީ، ހާރިޖީ ވަޒީރު މޫސާ ޒަމީރު އަދި ބަންޑާރަ ނާއިބު އަހްމަދު އުޝާމް، އިގްތިސާދާއި ބެހޭ ވަޒީރު މުހައްމަދު ސައީދު، އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު އަދި ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް އެވެ.
މިދިޔަ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި މިހާތަނަށް 36،000 އަށް ވުރެ ގިނަ ފަލަސްތީނުގެ ރައްޔިތުން ވަނީ ޝަހީދުކޮށްލާފައެވެ. އޭގެތެރޭގައި 25 ހާހެއްހާ މީހުންނަކީ މައުސޫމް ކުޑަކުދިންނާއި އަންހެނުނުންނެވެ. މީގެއިތުރުން 10،000 ވުރެ ގިނަ މީހުން ގެއްލިފައިވާއިރު އިޒްރާއީލުގެ ހަމަލާތަކުގައި ޒަހަމްވީ ފަލަސްތީނު ރައްޔިތުންގެ އަދަދު 81،000 ވުރެ މައްޗަށް އަރައެވެ.
