އުމުރުން 25 އަހަރުގެ އެމްބާޕޭ ފަސް އަހަރުގެ އެއްބަސްވުމެއްގެ ދަށުން ބާނަބައު ސްޓޭޑިއަމަށް ބަދަލުވާނީ، ހިލޭ ޓްރާންސްފާއެއްގައެވެ. 2018 ވަނަ އަހަރުގެ ވޯލްޑް ކަޕް ކާމިޔާބުކުރި ކުޅުންތެރިޔާވަނީ މިދިޔަ ފެބްރުއަރީ މަހު ރެއާލްއާ ގުޅެން އަނގަބަހުން އެއްބަސްވެ، ސީޒަން ނިމުމުން ފްރާންސްގެ ޗެމްޕިއަން ޓީމާ ވަކިވާނެކަން މެއި މަހު އިއުލާންކޮށްފަ އެވެ. އަދި ކުރިންވެސް ޕްލޭން ކުރެވިފައިވާ ގޮތަށް އެމްބާޕޭ މިހާރުވަނީ ރިއާލްއަށް ސޮއިކޮށްފައެވެ.
އެމްބާޕޭ ވަނީ 2029 ވަނަ އަހަރުގެ ނިޔަލަށް ރެއާލްއާ އެކު އެއްބަސްވުމެއް ހަދާފައެވެ. ރިޕޯޓްތައް ބުނާ ގޮތުން މި އެއްބަސްވުމުގެ ދަށުން ސީޒަނަކަށް 15 މިލިއަން ޔޫރޯ (12.8 މިލިއަން ޕައުންޑް) ލިބޭއިރު، އޭގެ އިތުރުން ފަސް އަހަރު ދުވަހުގެ ތެރޭގައި ދޭން ޖެހޭ 150 މިލިއަން ޔޫރޯ (128 މިލިއަން ޕައުންޑް) ގެ ސޮއިކުރުމުގެ ބޯނަސް ވެސް އޭނާއަށް ލިބޭނެއެވެ.
އޭނާ ފްރާންސްގެ ވެރިރަށް ދޫކޮށްލާނީ ޕީއެސްޖީގެ ރެކޯޑް ގޯލް ޖެހި ކުޅުންތެރިޔާގެ ގޮތުގަ އެވެ. މިދިޔަ ސީޒަންގައި ކުޅުނު 48 މެޗުން 44 ގޯލް ކާމިޔާބުކޮށް، ފާއިތުވި ހަ އަހަރު ފްރާންސްގެ ޓޮޕް ޑިވިޝަންގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމު އޭނާ ވަނީ ކާމިޔާބުކޮށްފައެވެ.
ކްލަބް ފެންވަރުގައި އޭނާ ވަނީ ލީގު 1 ގެ ހަތް ތަށި ހޯދައިފަ އެވެ. މޮނާކޯއާ އެކު ފުރަތަމަ ޗެމްޕިއަންކަން، ބާކީ ހަ ޗެމްޕިއަންކަން ޕީއެސްޖީއާ އެކު - އަދި ފްރެންޗް ކަޕްގައި ހަތަރު ވިނާސް މެޑަލް އެމްބާޕޭއަށް ލިބިފައިވެއެވެ.
ފްރާންސްގެ ކުޅުންތެރިޔާ ވަނީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި ފައިނަލްގައި ޕެނަލްޓީ ޖަހައިގެން އާޖެންޓީނާ އަތުން ބަލިވިނަމަވެސް މުބާރާތުގެ ގޯލްޑަން ބޫޓު ހޯދާފައެވެ.
