ކްލެމެންސީ ބޯޑަށް މަޖިލީހުގެ މެންބަރުންގެ ތެރެއިން ޝުޖާއުގެ ނަން ހުށައެޅީ ޕީއެންސީގެ ޕާލިމެންޓަރޫ ގްރޫޕްގެ ލީޑަރު އިނގުރައިދޫ ދާއިރާގެ މެމްބަރު އިބްރާހީމް ފަލާހުއެވެ. މި ހުށަހެޅުމަށް ތާއީދު ކުރެއްވީ ވިލިމާލެ ދާއިރާގެ މެންބަރު މުހައްމަދު އިސްމާއީލްއެވެ.
އިތުރު މެމްބަރެއްގެ ނަން ހުށައަޅާފައި ނުވާތީ ޝުޖާއުގެ ނަމަށް ވޯޓު ނެގުން އޮންނާނީ މިއަދު މަޖިލީހުގެ ވޯޓު ގަޑީގައެވެ.
20 ވަނަ ރައްޔިތުން މަޖިލިހަށް އެންމެ ގިނަ ވޯޓު ހޯދައިގެން ހޮވުނު ޝުޖާއު ވަނީ އާ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމެޓީގެ މުގައްރިރު ކަމަށްވެސް އިއްޔެ އައްޔަންކޮށްފައެވެ.
މި ކޮމެޓީއަކީ ސަރުކާރު ކުންފުނިތަކާއި ގުޅޭ މައްސަލަތައް ބެލުމަށް ހާއްސަ ކުރެވިފައިވާ މަޖިލީހުގެ ދާއިމީ ކޮމެޓީ އެކެވެ. ކޮމެޓީގައި ތިއްބަވާނީ 11 މެންބަރުންނެވެ. އެސްއޯއީ ކޮމިޓީގެ ނައިބު މުގައްރިރު ކަމަށް އައްޔަނުކޮށްފައިވަނީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން އެވެ.
