އައިޔޫއެމުން ހުޅުމާލެ ފުރަތަމަ ފިޔަވަހީގައި އިމާރާތްކުރާ "ސަނާބިލް" އިމާރާތަށް އިސްލާމިކް ފައިނޭންސް މޮޑެލްގެ ދަށުން ސުކޫކް ވިއްކައިގެން ފައިނޭންސް ރެއިޒްކުރުމަށް ހުޅުވާލާފައި ވަނީ އެކަމަށް ޓަކައި ހޯމަ ދުވަހު އެ ޔުނިވާސިޓީގައި ބޭއްވި ހާއްސަ ރަސްމިއްޔާތެއްގަ އެވެ. ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ޝަރަފުވެރިކޮށްދެއްވި މި ރަސްމިއްޔާތުގައި ފިނޭންސް މިނިސްޓަރު ޑރ. މުހައްމަދު ޝަފީގާއި ފިނޭންސް މިނިސްޓަރުގެ އެޑްވައިޒަރު އަހްމަދު މުނައްވަރު ބައިވެރިވެވަޑައިގެންނެވި އެވެ.
މި ރަސްމިއްޔާތުގައި މަޖިލިހުގެ ރައީސް އަބްދުއްރަހީމް ވިދާޅުވެފައި ވަނީ އިންސްޓިޓިއުޓެއްގެ ގޮތުގައި 1980 ވަނަ އަހަރު އުފެދި މިއަދާ ހަމައަށް އައިއިރު ޔުނިވާސިޓީގެ އިލްމީ ހިޔާވަހިކަމުން އިލްމު ހާސިލުކޮށް ދަސްވެނިވި ދަރިވަރުން ގައުމީ ހިދުމަތުގައި ނުހަނު ބޮޑަށް ފާހަގަކުރެވޭ ކަމަށެވެ. ދަރިވަރުންގެ އަހުލާގުގެ ހެޔޮ ތަފާތު ފެނިވަޑައިގަންނަވާކަން ފާހަގަކުރައްވާ މިފަދަ ހިދުމަތްތެރި މުއައްސަސާއެއް ދިރުވާ ތަރައްގީ ކުރުމުގެ މުހިންމުކަމުގެ މައްޗަށް އަބްދުއްރަހީމްގެ ވާހަކައިގައި ވަނީ އަލިއަޅުއްވާލައްވާފަ އެވެ.
އައިޔޫއެމް "ސަނާބިލް" އިމާރާތް ބިނާކުރުމަށް ކެޕިޓަލް މާކެޓް މެދުވެރިކޮށް ސުކޫކް ވިއްކައިގެން ފައިސާ ރެއިޒްކުރުމަށް ނިންމި ސަބަބުތަކާއި އިސްލާމިކް ފައިނޭންސްގެ މޮޑެލްއެއްގެ ތެރެއިން މިފަދަ މަޝްރޫއެއް ހިންގުމުން ލިބޭ ފައިދާތަކުގެ މައްޗަށް މި ޕްރޮޖެކްޓްގެ ޝަރީއާ އެޑްވައިޒަރު އުސްތާޒު އަޒްމީން ރަޝީދު ވަނީ ވާހަކަ ދައްކަވާފަ އެވެ. މި ޕްރޮޖެކްޓަށް އިޝޫކުރެވުނު ސުކޫކް ލިސްޓް ކުރުމަށް ބޭނުންވާ ހުރިހާ ހުއްދަތަކެއް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އާއި މޯލްޑިވްސް ސްޓޮކް އެކްސްޗޭންޖް (އެމްއެސްއީ) އިން ވަނީ މިހާރު ދީފައި ކަމަށް އައިޔޫއެމުން ބުނެ އެވެ.
އައިޔޫއެމްގެ ސަނާބިލް ޕްރޮޖެކްޓް އިފުތިތާހު ކުރުމަށް ބޭއްވި ރަސްމިއްޔާތުގެ ތެރެއިން - ފޮޓޯ:މަޖިލިސް
އައިޔޫއެމްގެ "ސަނާބިލް" ޕްރޮޖެކްޓަށް އިއްޔެ އިޝޫކޮށްފައި ވަނީ އެއް މިލިއަން ރުފިޔާގެ މޫނުމަތީ އަގުގެ 60 ސުކޫކެވެ. އައިޔޫއެމުން ބުނީ މި ސުކޫކުތައް އިޝޫކޮށްގެން ޖުމްލަ ރެއިޒް ކުރުމަށް އަމާޒުކޮށްފައި ވަނީ 60 މިލިއަން ރުފިޔާ ކަމަށެވެ. މި ސުކޫކުގައި އިންވެސްޓް ކުރުމަށް ބޭނުންވާ ފަރާތްތަކުން އެމްއެސްއީގެ ވިޔަނަ ޕޯޓަލް މެދުވެރިކޮށް މި މަހުގެ 23 ވަނަ ދުވަހުން ފެށިގެން ސުކޫކަށް ސަބްސްކްރައިބް ކުރެވޭނެ ކަމަށް އައިޔޫއެމުން ބުނެ އެވެ. މި ޕްރޮޖެކްޓުގެ ލީޑް މެނޭޖަރަކީ ރާއްޖޭގެ ވޯޓަކްރެސް ކެޕިޓަލް ޕްރައިވެޓް ލިމިޓެޑެވެ. އައިޔޫއެމުން ބުނި ގޮތުގައި މިހާރު ވެސް މި ސުކޫކަށް އިންވެސްޓް ކުރުމަށް ރާއްޖޭގެ ބޮޑެތި ބައެއް ކުންފުނިތަކުން ޝައުގުވެރިކަން ފާޅުކޮށް ވާހަކަ ދައްކަމުން އަންނަ ކަމުގަ އެވެ.
މި ރަސްމިއްޔާތުގައި އައިޔޫއެމްގެ ޑެޕިއުޓީ ވައިސް ޗާންސެލަރު އަހްމަދު އަމީން މުހައްމަދު ވަނީ އައިޔޫއެމްއަކީ މާސްޓަ ޑިގްރީ އާ ހަމައަށް އިސްލާމިކް ފައިނޭންސް ކިޔަވައިދޭ ހަމައެކަނި މަތީ ތައުލީމުގެ މަރުކަޒުކަމުން އިސްލާމީ ފައިނޭންސް ނިޒާމުގެ ތެރެއިން މިފަދަ ޕްރޮޖެކްޓެއް ހިންގުމަކީ އިސްލާމިކް ފައިނޭންސް ރާއްޖޭގައި އާލާކޮށް ދިރުވުމަށް ވެސް އެޅުނު މުހިންމު ފިޔަވަޅެއްގެ ގޮތުގައި ފާހަގަކުރައްވާފަ އެވެ.
"ސަނާބިލް" އިމާރާތަކީ އަށް ފަންގިފިލާއަށް އިމާރާތްކުރެވޭ ސްޓޭޓް-އޮފް-ދި އާޓް ފެސިލިޓީތައް ހިމެނޭ އިމާރާތެކެވެ. މި އިމާރާތުގައި އޮޑިޓޯރިއަމާއި ހޯލާއި ލެބޯޓްރީތަކާއި ކްލާސްރޫމްތަކުގެ އިތުރުން އޮފީސް ޖާގަތައް ހިމެނެ އެވެ. މި ތަންތަން އާންމުންނަށް ކުއްޔަށް ދޫކޮށް އެ ޔުނިވާސިޓީއަށް ދެމެހެއްޓެނިވި ގޮތެއްގައި އާމްދަނީ ހޯދުމަކީ އައިޔޫއެމްގެ ސްޓްރެޓެޖިކް އަމާޒެކެވެ.
