މިދުވަސްވަރަކީ ރާއްޖޭގައި ބަލިމަޑުކަން ބޮޑު ދުވަސްވަރެކެވެ. ރާއްޖޭގެ އެކި ސަރަހައްދުތަކުގައި ވައިރަލް ފީވާ، ޑެންގީ އަދި ޗިކުންޖުންޔާ ފަދަ ބަލިތައް ދަނީ ރިޕޯޓްކުރެވެމުންނެވެ.
"ސީއެންއެމް" އާ މައުލޫމާތު ހިއްސާކުރައްވަމުން އުލިގަމު ކައުންސިލް ރައީސް މުއާޒު ވިދާޅުވީ މިދުވަސް ވަރު އެ ރަށުގައި ވައިރަލް ފީވާ ބާރަށް ފެތުރެމުންދާކަަމަށެވެ.
މީގެ އިތުރުން ކައުންސިލް ރައީސް ވިދާޅުވި، ރަށުގެ ސިއްހީ މަރުކަޒާއި ސިއްހީ ދާއިރާ އޮތީ ދަތި އުނދަގޫ ހާލަތު ގައި އެވެ. އެގޮތުން ރަށުގެ ސިއްހީ މަރުކަޒު ގިނަ ދުވަސްވެ ބާވެފައި ހުރިކަމަށާއި އެނދުގެ ޖާގާގައިވެސް ދަތިކަން ހުރިކަމަށް މުއާޒް ވިދާޅުވި އެވެ.
އެކަން ކަން ހައްލުކުރުމަށް ސަރުކާރުގެ ކަމާ ބެހޭ ފަރާތަތަކާ އެކު މީގެ ކުރިންވެސް މައުލޫމާތު ހިިއްސާކޮށްފައިިވާކަމަށާއި ސަރުކާރުން އުލިގަމުގައި ސިއްހީ މަރުކަޒެއް އިމާރާތްކޯށްދިނުމަކީ ރައީސްގެވެސް ވައުދުފުޅެއްް ކަމަަށްކަންވެސް މުއާޒު ފާހަގަކުރެއްވި އެވެ.
އޭގެ އިތުރުން ހެލްތް މިނިސްޓްރީގެ ފަރާތުން އެކަންތައް ކުރިއަށް ދާކަމުގެ މައުލޫމާތު ލިބިފައިވާކަމަށްވެސް ކައުންސިލް ރައީސް ވިދާޅުވި އެވެ. އެގޮތުން މިނިސްޓަރާ ބައްދަލުކުރެއްވިއިރު މިއަހަރު ތެރޭ ސިއްހީ މަރުކަޒުގެ މަސައްކަތް ކުރިއަށް ދާނެކަމަށް ވިދާޅުވެފައިވާކަންވެސް މުއާޒު ފާހަގަކުރެއްވި އެވެ.
ވައިރަލް ހުމުގެ އިތުރުން ޑެންގީ ހުން ޖެހިގެން އޭޕްރީލް މަހު އެކަނިވެސްް ރިޕޯޓްކުރި އަދަދު 244 އަށް އަރާފައިވާކަމަށް ހެލްތް މިނިސްޓްރީގެ ތަފާސް ހިސާބުތަކުން ދައްކައެވެ. އެހެނިހެން ބަލިތަަކަށް ބަލާއިރު، އަރިދަފުސް ރޯގާ ޖެހިގެ 22،739 ކޭސް ބޭރަށް ހިންގުމުގެ 2،714 ކޭސް އޭޕްރީީލް މަހު ރިޕޯޓްކޮށްފައިވާކަމަށް މިނިސްޓްރީން ބުނެއެވެ.
