ޕޯޓޯ އާއި އިންޓަ މިލާނާއެކު ޗެމްޕިއަންސް ލީގު ކާމިޔާބުކުރި ޕޯޗުގަލް ކޯޗު، މިދިޔަ ޖެނުއަރީ މަހު އިޓަލީގެ ސެރީއާގެ ރޯމާއިން އޭނާ ވަކިކުރި ފަހުން އޭނާ ކޯޗިންގެ އެއްވެސް މަސައްކަތެއް ނުކޮށް ހުރުމަށް ފަހު މި ހަފްތާގައިވަނީ ތުރުކީގެ ފެނަބާޗޭއާ ހަވާލުވެފައެވެ.
ފެނަބާޗޭގެ ކޯޗުކަމުގެ މަގާމާ، ދެ އަހަރަށް މޮރީނިއޯ ހަވާލުވީއިރު، އޭނާގެ ކޮންޓްރެކްޓްގައިވަނީ ޕޯޗުގަލްގެ ގައުމީ ޓީމުން ފުރުސަތު ލިބިއްޖެނަމަ ވަގުތުން ކޮންޓްރެކްޓް ބާތިލު ކުރެވޭ ގޮތަށް ކަމަށް ރިޕޯޓްތައް ބުނެއެވެ. ދެ އަހަރަށް މޮރީނިއޯ ފެނަބާޗޭއާ ހަވާލުވީ އިތުރު އަހަރަކަށް ކޮންޓްރެކްޓްގެ މުއްދަތު އިތުރު ކުރެވޭ ގޮތަށެވެ.
އުމުރުން 61 އަހަރުގެ ޕޯޗުގަލްއަށް ނިސްބަތްވާ މޮރީނިއޯ، އޭނާގެ އާ ކްލަބު އިއުލާން ކުރީ ޗެމްޕިއަންސް ލީގުގެ ފައިނަލް މެޗު ކުޅުނު ވެމްބްލީ ސްޓޭޑިއަމްގައި ޓީއެންޓީ ސްޕޯޓްސް ޓީވީގެ ޕަންޑިޓެއްގެ ގޮތުގައި ވާހަކަ ދައްކަމުންނެވެ.
ޕޯޓޯ އާއި އިންޓަ މިލާނާއެކު ޗެމްޕިއަންސް ލީގު ކާމިޔާބުކުރި ޕޯޗުގަލް ކޯޗުވަނީ ޗެލްސީ، މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް އަދި ރެއާލް މެޑްރިޑް ވެސް ކޯޗުކޮށްދީފަ އެވެ. މޮރީނިއޯ ވަނީ 2022 ވަނަ އަހަރު ފުރަތަމަ ފަހަރަށް ޔޫރޮޕާ ކޮންފަރެންސް ލީގު ތަށި ހޯދައި، މިދިޔަ ސީޒަނުގެ ޔޫރޮޕާ ލީގުގެ ފައިނަލަށް ރޯމާ ގެންގޮސްދީފައެވެ.
