މީގެ ހަފްތާއެއް ކުރިން ރިއާލް މެޑްރިޑާއެކު، ޗެމްޕިއަންސް ލީގު ކާމިޔާބުކުރި މޮޑްރިޗްގެ ހާއްސަ މެސެޖެއް ވީޑިއޯ މެދުވެރިކޮށް ފޮނުވީ އިންޑިޔާގެ ގައުމީ ޓީމުގެ ކޯޗު، ކްރޮއޭޝިއާގެ އީގޯ ސްޓިމަކް މެދުވެރިކޮށެވެ. ޗެތްރީއަށް ތައުރީފުކޮށް މޮޑްރިޗް ފޮނުވި ވީޑިއޯ މެސެޖު އާއްމުކުރީ އެކްސްގައި ސްޓިމަކްއެވެ.
އިންޑިއާގެ ލެޖެންޑަރީ ސްޓްރައިކަރު، ސުނިލް ޗެތުރީ، ގައުމީ ޓީމަށް ކުޅޭ އެންމެ ފަހު މެޗު އޮންނާނީ މިރޭއެވެ. އުމުރުން 39 އަހަރުގެ ޗެތުރީ، އިންޑިއާ ގައުމީ ޓީމަށް ކުޅޭނެ އެންމެ ފަހު މެޗަކީ، މިރޭ ކުވެއިތާ ދެކޮޅަށް ކުޅޭ ފީފާ ވޯލްޑް ކަޕް ކޮލިފައިން މެޗެވެ. މި މެޗު ކުޅޭނީ އިންޑިޔާގެ ފުޓްބޯޅައިގެ ހިތްކަމުގައި ބެލެވޭ ކަލްކަތާގެ ސޯލްޓް ލޭކް ސްޓޭޑިއަމްގައެވެ.
އިންޑިއާ ގައުމީ ޓީމަށް 2005 ވަނަ އަހަރުން ފެށިގެން ކުޅެމުން އަންނަ ޗެތުރީ، ވަނީ އެ ޓީމަށް 145 މެޗުން 94 ގޯލު ޖަހައިފަ އެވެ. ގައުމީ ޓީމަށް އެންމެ ގިނަ ގޯލު ޖަހައިދިން ކުޅުންތެރިންގެ ލިސްޓުގައި، މި ވަގުތު ކުޅޭ ކުޅުންތެރިންގެ ލިސްޓުގެ ތެރެއިން، ޗެތުރީ އަށް ވުރެ ކުރީގައި އޮތީ ކްރިސްޓިއާނޯ ރޮނާލްޑޯ އާއި ލިއޮނަލް މެސީ އެވެ.
