ދުނިޔޭގެ ތިމާވެށީ ދުވަހުގެ މުނާސަބަތާ ގުޅުވާ ފަސް މިލިއަން ގަސް އިންދުމުގެ މަޝްރޫއު އިފްތިތާހުކޮށްދެއްވީ ރައީސް ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދުއެވެ.
މި މަޝްރޫއުގައި ސަރުކާރު އޮފީސްތަކާއި ކުންފުނިތަކާއި ސްކޫލްތަކުން ވަކިވަކިން އަންނަނީ ބައިވެރިވަމުންނެވެ. ތިމާވެއްޓާއި ބެހޭ ވުޒާރާއިން ބުނީ މި މަޝްރޫއުގައި ޖަމާލުއްދީން ސްކޫލް ބައިވެރިވި 5 އަހަރުގެ ތެރޭގައި 100 ގަސް އިންދުމަށް އެ ސްކޫލުން ވައުދުވެފައިވާކަމަށެވެ.
5 މިލިއަން ގަސް އިންދުމުގެ މަޝްރޫއުގައި ޖަމާލުއްދީންގެ ދަރިވަރުންތަކެއް ގަސް އިންދަނީ. އެ ސްކޫލުން ވަނީ 100 ގަސް 5 އަހަރުތެެރޭ އިންދަން ވައުދުވެފައި
ތިމާވެއްޓާއި ބެހޭ ވުޒާރާއިން ބުނީ ގަސް އިންދަން ފެށި ދުވަހު އެކަނިވެސް 40،000 ގަސް އިންދާފައިވާކަމަށެވެ. މި ގަސްތައް އިންދާފައިވަނީ ރާއްޖޭގައި މީހުން ދިރިއުޅޭ ރަށްތަކުގެ ކައުންސިލްތަކާއި ރިސޯޓުތަކާއި ސްކޫލްތަކާ އަދި އަމިއްލަ ޖަމިއްޔާތަކުން ހިންގި ހަރަކާތްތަކުގައއިކަން އެ ވުޒާރާއިން ފާހަގަކުރެއެވެ.
ތިމާވައްޓާއި ބެހޭ ވުޒާރާއިން ބުނީ މި ޕްރޮގްރާމުން ދައްކުވައިދެނީ، ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތް ކުރުމަށާއި މޫސުމަށް އަންނަ ބަދަލުތަކުގެ ސަބަބުން މިހާރުގެ ޖީލުތަކާއި އަންނަން އޮތް ޖީލުތަކުގެ ލާބަ އާއި މަންފާއަށްޓަކައި މޫސުމަށް އަންނަ ބަދަލުތަކުން ކުރާ ނޭދެވޭ އަސަރުތަކުން އަރައިގަތުމަށް ސަރުކާރުން ކުރަމުން ގެންދާ މަސައްކަތްތަކެވެ.
މިފަހަރުގެ ތިމާވެށީގެ ދުވަހުގެ ޝިއާރަކީ "ލޭންޑް ރީސްޓޯރޭޝަން، ޑީސެޓިފިކޭޝަން އެންޑް ޑްރޯޓް ރެސިލިއެންސް" ކަމަށް ވާއިރު މި ގަސް އިންދުމުގެ ޕްރޮގްރާމް ވަނީ މި ޝިއާރާ ގުޅިފައެވެ.
