ވަޒީރުކަމާއި ހަވާލުވެވަޑައިގެންތާ ދާދި ކައިރީގައިވެސް ރަމީލާ ވަނީ ކެންސަރަށް ފަރުވާ ހޯދުމަށް ވަޑައިގެންފައެވެ. އެފަހަރު ނޮވެމްބަރު 29 ގައި ފަރުވާއަށް ވަޑައިގަތުމަށްފަހު އެނބުރި ވަޑައިގެން އޮފީހަށް ނުކުންނެވި ފެބްރުއަރީ 4 ގައެވެ.
ރަމީލާ ފޭސްބުކްގައި ހިއްސާ ކުރެއްވި ޕޯސްޓެއްގައި ވިދާޅުވީ އަނެއްކާވެސް އިތުރު ސާޖަރީއަކާއި ކީމޯތެރަޕީ އަދި އިމިއުނޯތެރަޕީއަށް ހޮސްޕިޓަލުގައި އެޑްމިޓް ކޮށްފައިވާ ކަމަށެވެ. އަދި މެޓަސްޓޭޓިކް ސީރަސް ޕެޕިލަރީ ކާސިނޯމާއަށް ފަރުވާ ހޯއްދަވަމުން ގެންދަވާތާ ހަ މަސްވެފައިވާ ކަމަށްވެސް ވަޒީރު ވިދާޅުވިއެވެ.
މެޓަސްޓޭޓިކް ކެންސަރަކީ ހަށިގަނޑުގެ އެއް ގުނަވަނުން އަނެއް ގުނަވަނަށް ފެތުރޭ ކެންސަރަކެވެ.
ކެންސަރުގެ އެ ދަތުރަކީ ދިރިއުޅުން ކުރިއަށް ގެންދަން ފަސޭހަ ދަތުރެއް ނޫންކަން ރަމީލާ ވަނީ ފާހަގަކުރައްވާފައެވެ.
ނަރުހެއްގެ ގޮތުގައި 1990 ވަނަ އަހަރު މަސައްކަތް ފެއްޓެވި ޑރ. ރަމީލާ ވަނީ ހެލްތު މިނިސްޓްރީގެ ސްޓޭޓް މިނިސްޓަރުކަން ދެ ފަހަރެއްގެ މަތިން ކުރިން ކުރައްވާފަ އެވެ. ޑރ. ރަމީލާ ވަނީ 2010 ވަނަ އަހަރު ސޯޝަލް ސައިންސްގެ ދާއިރާއިން މެލޭޝިއާއިން ޕީއެޗްޑީވެސް ހާސިލުކުރައްވާފައެވެ.
