އާޓިފިޝަލް ބީޗުގައި މިއަދު ބޭއްވި ހާއްސަ ހަރަކާތެއްގައި ކަޔާނަށް ރަސްމީކޮށް ބްރޭންޑް އެމްބެސެޑަރޝިޕް ހަވާލުކޮށްދެއްވީ ދިރާގުގެ ޑިރެކްޓަރު، ބްރޭންޑް އެންޑް މާކެޓިން ކޮމިއުނިކޭޝަންސް މުހައްމަދު މިރުޝާން ހަސަން އެވެ. މި ރަސްމިއްޔާތުގައި ވާހަކަ ދައްކަވަމުން ދިރާގުގެ ޑިރެކްޓަރ، ބްރޭންޑް އެންޑް މާކެޓިންގ ކޮމިއުނިކޭޝަންސް، މުހައްމަދު މިރުޝާން ހަސަން ވިދާޅުވީ، “ދިރާގުގެ އެންމެ އާ ޔޫތު ބްރޭންޑް އެމްބެސެޑަރުގެ ގޮތުގައި ކަޔާން ފަދަ ކުރިއަރަމުން އަންނަ ޒުވާން ހުނަރުވެރިއެއް ލިބުމަކީ ދިރާގަށް ލިބުނު ޝަރަފެއް” ކަމަށެވެ.
ކަޔާންއަކީ ރާޅާއެޅުމުގެ މުޖުތަމައުގައި ކުރިއަރަމުން އަންނަ ތަރިއެކެވެ.
ދިރާގުން ވަނީ މިއަހަރުގެ ދުނިޔޭގެ ކަނޑުތަކުގެ ދުވަހުގެ ހަނދާނުގައި ކުޑަކުދިންގެ ރާޅާއެޅުމުގެ ކްލިނިކެއް ވެސް އާޓިފިޝަލް ބީޗުގައި މިއަދު ބާއްވައިފަ އެވެ. މޯލްޑިވްސް ސަރފިންގ އެސޯސިއޭޝަން (އެމްއެސްއޭ) އިން އެންޑޯސްކޮށްފައިވާ މި ސްޕެޝަލް ސާފް ކްލިނިކް ކުރިއަށް ގެންގޮސްފައިވަނީ ޔޫތު ބްރޭންޑްގެ އާ އެމްބެސެޑަރ ކަޔާން އާއި އެކުގައެވެ. މި ސެޝަން މެދުވެރިކޮށް ޒުވާން ބައިވެރިންނަށް ކަނޑާއި ތަފާތު ރާޅާއެޅުމުގެ ޕޮއިންޓްތަކާއި ސޭފްޓީ ޓިޕްސްގެ އިތުރުން ބިގިނަރ ޓެކްނިކްސް ދަސްކޮށްދިނެވެ.
