މެއި މަހުގެ ފަހުކޮޅު އޮޑިޓަ ޖެނެރަލް ނެރުއްވާފައިވާ ޑިފެންސް މިނިސްޓްރީގެ 2022 ވަނަ އަހަރުގެ އޮޑިޓް ރިޕޯޓުގައި ފާހަގަކޮށްފައިވާ ގޮތުން، އެ އަހަރު އެ މިނިސްޓްރީން ހުރިހާ ހަރަދެއްވެސް ކޮށްފައިވަނީ އެ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓާ އެއް ގޮތަށެވެ.
އޮޑިޓް ރިޕޯޓުގައި ބުނެފައިވާ ގޮތުގައި މައިގަނޑު ގޮތެއްގައި ޑިފެންސް މިނިސްޓްރީން 31 ޑިސެމްބަރު 2022 އަށް ނިމުނު މާލީ އަހަރުގެ ހަރަދުތައް ކޮށްފައިވަނީ އެ އަހަރަށް ރައްޔިތުންގެ މަޖިލީހުން އެމްއެންޑީއެފަށް ފާސްކޮށްދެއްވި ބަޖެޓުގެ މަގްސަދުތައް ހާސިލްވާ ގޮތަށެވެ. އަދި ބަޖެޓުގައި ކަނޑައެޅިފައިވާ ކަންތައްކަކަށް ބަޖެޓްގައި ކަނޑައެޅިފައިވާ މިންވަރަށް، ދައުލަތުގެ މާލިއްޔަތު ގާނޫނާ ދައުލަތުގެ މާލިއްޔަތު ގަވައިދާ އެއް ގޮތަށް ކޮށްފައިވާކަމަށް ރިޕޯޓްގައި ބުނެފައި ވެއެވެ.
2022 ވަނަ އަހަރުގެ އޮޑިޓް ރިޕޯޓްގައި ޑިފެންސް މިނިސްޓްރީގެ ހުރިހާ ހަރަދެއްވެސް ކޮށްފައިވަނީ ރަނގަޅަށް ކަމަށް ބަޔާންކޮށްފައިވާއިރު، އެމްއެންޑީއެފްގެ 2021 ވަނަ އަހަރުގެ ހުރިހާ ހަރަދެއްވެސް ކޮށްފައިވަނީ ރަނގަޅަށް ކަމަށް އެ އިދާރާގެ އެ އަހަރުގެ އޮޑިޓް ރިޕޯޓްގައި ބުނެފައިވެ އެވެ.
