މި ދެ އެވޯޑް ދެވޭނީ ކޮންމެ ދިރާސީ އަހަރެއްގެ އެވޯޑަށް ކުރިމަތިލާ ފަރާތްތަކުގެ ތެރެއިން އެންމެ މަތިން ޕޮއިންޓް ހާސިލުކޮށްފައިވާ އެންމެ ހަރަކާތްތެރި ހިއުމަން ރައިޓްސް ކްލަބަކަށާއި ހިއުމަން ރައިޓްސް ކްލަބްގެ ދަރިވަރަކަށްކަަމަށްވާއިރު ހިއުމަން ރައިޓްސް ކޮމިޝަނުން ވަނީ އެ ދެ އެވޯޑް ދިނުމުގެ މަގްސަދަށް އަލިއަޅުވާލާފައެވެ.
އެގޮތުން މި ދެ އެވޯޑް ދިނުމުގެ މައިގަނޑު މަގްސަދަކީ އިންސާނީ ހައްގުތަކަށް ސްކޫލްތަކުގެ ދަރިވަރުން އަހުލުވެރިކުރުވައި، މުސްތަގްބަލްގައި ހިއުމަން ރައިޓްސް ޑިފެންޑަރުންގެ ގޮތުގައި މަސައްކަތްކުރާނެ ދަރިވަރުންތަކެއް އުފެއްދުމަށް ބާރުއެޅުންކަމަށް ހިއުމަން ރައިޓްސް ކޮމިޝަނުން ފާހަގަކުރެއެވެ.
މީގެ އިތުރުން މިއަދުން ފެށިގެން އަންނަ ޖުލައި މަހުގެ 11ގެ ނިޔަލަށް ރާއްޖޭގެ ސްކޫލްތަކުގައި ގާއިމްކުރެވިފައިވާ ހިއުމަން ރައިޓްސް ކްލަބްތަކަށާއި އެ ކްލަބްތަކުގެ ދަރިވަރުންނަށް އެވޯޑަށް ކުރިމަތިލުމުގެ ފުރުސަތު ހުޅުވާލާފައިވާކަން ހިއުމަން ރައީތްސް ކޮމިޝަނުން ފާހަގަކުރެއެވެ.
އެ ދެ އެވޯޑަށް ކުރިމަތިލުމަށް ހުށަހަޅަންޖެހޭ އެޕްލިކޭޝަން ފޯމް، އެވޯޑަށް ހޮވުމުގައި ބަލާނެ މިންގަނޑު، އަދި އިތުރު މައުލޫމާތު ވެބްސައިޓް ލިންކުން ލިބެން ހުންނާނެކަމަށް ހިއުމަން ރައިޓްސް ކޮމިޝަނުން ބުނެއެވެ. އަދި އެޕްލިކޭޝަން ހުށަހެޅުމަށް ފޯމް އަދި ފޯމާއެކު ހުށަހަޅަންޖެހޭ އިތުރު ލިޔުންތައް އީމެއިލް ކުރެއްވުމަށް އެ ކޮމިޝަނުން ވަނީ އިލްތިމާސްކޮށްފައެވެ.
"ބެސްޓް ހިއުމަން ރައިޓްސް ކްލަބް 2023-2024" އެވޯޑް އަދި "ޔަންގް ހިއުމަން ރައިޓްސް އެޑްވޮކޭޓް 2023-2024" އެވޯޑްއަކީ ސްކޫލްތަކުގެ ހިއުމަން ރައިޓްސް ކްލަބްތަކުންނާއި އެ ކްލަބްތަކުގެ ދަރިވަރުން ކުރާ މަސައްކަތުގެ އަގުވަޒަން ކުރުމުގެ ގޮތުން ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ދޭ 2 އެވޯޑްކަމަށް އެ ކޮމިޝަނުން މައުލޫމާތުދެ އެވެ.
