ސަރުކާރު ކޯލިޝަންގައި ހިމެނޭ މެމްބަރު ހުސެއިން ޝަރީފު (ހުސެންބެ) އެކްސްގައި ކުރި ޕޯސްޓެއްގައި ބުނީ ހުޅުމާލޭ ހިތްފަސޭހަ މާހައުލުން ބިރުވެރިކަމުގެ އިހްސާސް ކުރެވެން ފަށާފައިވާކަމަށެވެ.
ސަބަބެއްކަމަށް ފުލުހުން ޓެގްކޮށް އޭނާ ވިދާޅުވީ ސައިލަންސަރު އަޑުގަދަކޮށް ދުއްވާ ސައިކަލް ނުހުއްޓުވި އަދި ފިޔަވަޅު ނޭޅުމުގެ ނަތީޖާކަމަށެވެ. އަދި މިކަމުގެ ސަބަބުން އާއްމު ރައްޔިތުންގެ ހިތްތައް ބިރުވެރިކަން ވަދެ ހުޅުމާލޭގައި ބިރުވެރިކަމުގެ އިހްސާސްކުރެވޭކަމަށް ހުސެއިންބެ ވަނީ ވިދާޅުވެފައެވެ.
ހުސެއިން ޝަރީފްގެ މި ޕޯސްޓާއި ގުޅިގެން ކޮމެންޓްކުރި ގިނަ މީހުން ބުނީ މިކަން ކުރާ މީހުން އެކަން ކުރަމުން އަންނަނީ ފުލުހުންނަށް އެނގިގެންކަމަށެވެ. އަދި މިކަން ދެން ނުހުއްޓުވޭނެކަމަށް ވެސް ބައެެއް މީހުން ބުނެއެވެ.
މި ސަރުކާރުގެ ވައުދެއްގެ ގޮތުން ހުޅުމާލޭގައި ރޭސިން އަދި ޑްރިފްޓު ކުރުމަށް ހާއްސަ ސަރަހައްދެއް އެޗްޑީސީން ވަނީ ކަނޑައަޅައިފައެވެ. އަދި މިކަމަށް ކަނޑައެޅި ސަރަހައްދު މި ދިޔަ މަޖިލިދސް އިންތިހާބުގެ ތެރޭގައިވަނީ ކުޅިވަރާއި ބެހޭ ވުޒާރާއާއި ހަވާލުކޮށްފައެވެ.
