ނައިބު މިހެން ވިދާޅުވީ 4 ވަނަ ދިވެހި ސިވިލް ސާވިސް ކޮންފަރެންސް ހުޅުވުމުގެ ރަސްމިއްޔާތު ޝަރުވެރިކޮށްދެއްވާ ވާހަކަ ދައްކަވަމުންނެވެ.
ނައިބި ރައީސް ހުސައިން މުހައްމަދު ލަތީފް ވިދާޅުވީ މި ސަރުކާރުގެ އެންމެ މުހިއްމު އަމާޒަކީ ރައްޔިތުންނަށް ދޭ ހިދުމަތްތައް އަވަަސްކުރުންކަމަށްވާތީ އެކަން ހާސިލުކުރުމަށް ސިވިލް ސާވިސްގެ ދައުރު ވަރަށް ބޮޑުކަމަށެވެ. އަދި ރައްޔިތުނަށް ހިދުމަތް ކުރުމަކީ ވަރަށް ކެތްތެރިކަމާއި ހިކުމަތްތެރިކަމާއި ކަމަށް ކަމޭ ހިތުމާއެކު އަދާކުރަންޖެހޭ ބުރަ ޒިންމާއެއްކަން ފާހަގަކުރައްވަމުން ނައިބު ރައީސް ވިދާޅުވީ ސަރުކާރު ހިންގުމުގައި ސިވިލް ސާވިސްގެ އެހީތެރިކަމާ އެއްބާރުލުން ސަރުކާރަށް ބޭނުންވާކަމަށެވެ.
ކުރިއަރަމުންދާ ޓެކްނޮލޮޖީއާއެކު ޒަމާނާ ގުޅޭގޮތަށް ސވިލް ސާވިސްގެ ހިދުމަތްތައް ބައްޓަން ކުރުމަށް ނައިބު ވަނީ ގޮވާލައްވާފައެވެ. އޭގެ ތެރޭގައި އޮންލައިންކޮށް ޚިދުމަތްދިނުންފަދަ ކިޔޫގައި ޖެހެން ނުޖެހި ޒަމާނީ ޓެކްނޮލޮޖީގެ އެހީގައި ހައްލު ހޯދެންހުރި ކަންކަމަށް ހައްލު ހޯދުންފަދަ ކަންކަން އެމަނިކުފާނު ފާހަގަކުރެއްވިއެވެ.
"ސްމާރޓް ގަވަރނަންސް ފޯރ ސިވިލް ސަރވިސް އެކްސެލެންސް" މި ތީމުގެ ދަށުން މިއަދު ފެށި 4 ވަނަ ދިވެހި ސިވިލް ސަރވިސް ކޮންފަރެންސްގައި ޖުމްލަ 3 ދާއިރާއަކުން 15 ކަރުދާސް ހުށަހެޅުމަށް ހަމަޖެހިފައިވެއެވެ. އަދި މުޅި ރާއްޖޭގެ އެކި ކަންކޮޅުތަކުން ޖުމްލަ 250 އަށްވުރެ ގިނަ ބައިވެރިވެރިން މި ކޮންފަރެންސްގައި ބައިވެއެވެ.
