ފެނަކައިން މިއަދު ބުނެފައި ވަނީ ފުވައްމުލަކުގެ ވެކިއުމް ސްޓޭޝަން ދޭކަށް ދިމާވި މައްސަލަ އާ ގުޅިގެން ފެނަކަ ހިތަދޫ ބްރާންޗުގެ ޓެކްނިކަލް ޓީމަކުން އެ ސިޓީއަށް ދަތުރުކޮށްފައިވާ ކަމަށެވެ. އެ ޓީމުން ސްޓޭޝަނަށް މައްސަލަ ހޯދައި ހައްލުކޮށްފައިވާ ކަމަށް ފެނަކައިން ބުނެ އެވެ.
ފެނަކައިގެ މީޑިއާ އޮފިޝަލް އަލީ މަޝާރު މުސްތޮފާ "ސީއެންއެމް" އަށް ވިދާޅުވީ ފުވައްމުލަކުގައި ގާއިމުކޮށްފައި ފެނުގެ ވެކިއުމް ސްޓޭޝަން ދޭއްގެ ޕަމްޕަކަށް ޓެކްނިކަލް މައްސަލައެއް ދިމާވެފައި ވަނީ އިއްޔެގެ ވަގުތެއްގައި ކަމަށެވެ. އެ މައްސަލަ ދިމާވުމާ ގުޅިގެން ހިތަދޫ ބްރާންޗުގެ ޓެކްނިކަލް ޓީމަކުން އެ ސިޓީއަށް ދަތުރުކޮށް ޕަމްޕަށް ދިމާވި މައްސަލަ އިއްޔެ ހައްލުކޮށްފައިވާ ކަމަށް މަޝާރު ވިދާޅުވި އެވެ.
ފެނަކައިން ބުނި ގޮތުގައި މިފަދަ މައްސަލަތައް ދިމާވާ ސަބަބުތައް ދެނެގަނެ ހައްލު ކުރަމުންދާނެ ކަމުގެ ޔަގީންކަންދޭ ކަމުގަ އެވެ.
