ގައުމީ ޗެސް މުބާރާތުގެ އިނާމް ދިނުމުގެ ރަސްމިއްޔާތު، ޝަރަފުވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއުއެވެ. މި މުބާރާތުގެ އޯޕަން ބައިގެ އަންހެން އަދި ފިރިހެން ޗެމްޕިއަން ކުޅުންތެރިންނަށް އިނާމް ހަވާލުކޮށްދެއްވީވެސް މިނިސްޓަރެވެ.
މިއަހަރުގެ ގައުމީ ޗެސް މުބާރާތަކީ މިހާތަނަށް އެންމެ ގިނަ ކުޅުންތެރިން ވާދަކުރި ގައުމީ މުބާރާތެވެ. މިއަހަރު ދެ ކެޓަގަރީގައި 111 ކުޅުންތެރިން ވާދަކުރި އެވެ. އެއީ އަންހެން ކެޓަގަރީގައި 33 ކުޅުންތެރިންނާއި އޯޕަން ބައިގައި 78 ކުޅުންތެރިންނެވެ. މެއި މަހުގެ 27 އިން ޖޫން ހަތަކަށް ކުރިއަށްދިޔަ މުބާރާތުގެ ދެ ކެޓަގަރީގައި ޖުމްލަ 580 މެޗު ކުޅުނެވެ.
މި އަދަދުތަކަކީ މިދިޔަ އަހަރާ ބަލާއިރު 24 އިންސައްތަ ކުރިއެރުމެކެވެ. މިދިޔަ އަހަރުގެ އަންހެން ބައިގައި ވާދަކުރީ 19 ކުޅުންތެރިންނެވެ. އޯޕަން ބައިގައި ވާދަކުރީ 65 ކުޅުންތެރިންނެވެ.
