ޖެންޑާ މިނިސްޓްރީން ބުނީ މި އެއްބަސްވުމުގެ މައިގަނޑު މަގުސަދަކީ ނުކުޅެދުންތެރިކަން ހުންނަ ފަރާތްތަކަށް މަސައްކަތުގެ ޢަމަލީ ތަޖުރިބާ ލިބިގަނެ، މަސައްކަތުގެ މައިދާނަށް ތައްޔާރުވުމަށް ބޭނުންވާނެ އެކި ހުނަރުތައް ތަރައްޤީކުރުމުގެ ފުރުސަތުތައް ފަހިކުރުން ކަމަށެވެ.
މިފަދަ އިންޓާންޝިޕްތަކުގެ ބައިވެރިންނަށް އެފަރާތްތަކުގެ ޝައުގުވެރިކަން ހުރި ދާއިރާތައް ފާހަގަކުރުމަށް ފަސޭހަވެގެންދިއުމުގެ އިތުރުން ވަޒީފާދޭ ފަރާތްތަކަށްވެސް ހާއްސަ އެހީއަށް ބެނުންވާ ފަރާތްތަކާއެކު މަސައްކަތްކުރުމަށް އަހުލުވެރިވެގެންދާނެ ކަމަށާއި އަދި ދާއިމީ ވަޒީފާތަކުގެ ފުރުސަތުތައް ނުކުޅެދުންތެރިކަން ހުންނަ ފަރާތްތަކަށްވެސް ފަހިވެގެންދިއުމާއެކު، މަސައްކަތުގެ މާހައުލަށް އަހުލުވެރި ފަރާތްތަކެއް ބިނާކުރެވިގެންދާނެ ކަމަށް މިނިސްޓްރީން ބުނެ އެވެ.
ނުކުޅެދުންތެރިކަން ނުވަތަ ހާއްސަ އެހީއަށް ބޭނުންވާ ފަރާތްތައް ބާރުވެރިކުރުވާ، މަސައްކަތުގެ މާހައުލަށް ނެރެ، މިނިވަންކަމާއެކު ދިރިއުޅެވޭ ބަޔަކަށް ހެދުމުގެ މައިގަނޑު އެއް މަގުސަދަކީ މިފަދަ ފަރާތްތަކުގެ ސަބަބުން އިތުރު އެހެން ފަރާތްތަކަށްވެސް މިފަދަ ކަންކަން އިސްނަގައިގެން ކުރުމުގައި ހިތްވަރުދީ، ނުކުޅެދުންތެރިކަންހުރި ފަރާތްތަކަށް ކުރިއަރައިދިއުމުގެ ފުރުސަތު ފަހިކޮށްދިނުން ކަމަށް މިނިސްޓްރީން ހާމަކުރެ އެވެ.
ހާއްސަ އެހީއަށް ބޭނުންވާ ފަރާތްތަކަށް ހާއްސަކޮށްގެން އިންޓަރންޝިޕް ޕްރޮގްރާމެއް ކުރިއަށް ގެންދިއުމަށް ސޮއިކުރުން
ވެލާނާ އިންޓަނޭޝަނަލް އެއާޕޯޓް ހިންގާ އެމްއޭސީއެލްގެ ހެޑް އޮފީހުގައި މިއަދު ބޭއްވި ރަސްމިއްޔާތެއްގައި އެމްއޭސީއެލްގެ ފަރާތުން އެއްބަސްވުމުގައި ސޮއިކުރެއްވީ ކުންފުނީގެ ޑެޕިއުޓީ މެނޭޖިންގ ޑައިރެކްޓަރު މުހައްމަދު ލަމްއާނެވެ. ޖެންޑާ މިނިސްޓްރީގެ ފަރާތުން ސޮއި ކުރެއްވީ މިނިސްޓަރ އޮފް ސްޓޭޓް އަހުމަދު އާތިފްއެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެމް.އޭ.ސީ.އެލްގެ ޑެޕިއުޓީ މެނޭޖިންގ ޑައިރެކްޓަރ ލަމްއާން ވިދާޅުވީ މި ޕްރޮގްރާމްގެ ތެރެއިން އިންޓަރންޝިޕް ދެވޭ މީހުންނަށް ލިބެންޖެހޭ ތަޖުރިބާ އެންމެ ފުރިހަމައަށް ފޯރުކޮށްދިނުމަށް ކުންފުނިން މަސައްކަތްތައް ކުރާނެ ކަމަށެވެ.
އެމްއޭސީއެލްއިން މީގެކުރިންވެސް ވަނީ މިފަދަ ތަފާތު އެހީގެ ޕްރޮގްރާމްތައް ކުރިއަށް ގެންގޮސްފަ އެވެ.
