އެނގިފައިވާ ގޮތުގައި ފާސްކުރަމުން އަންނަނީ މިދިޔަ ސަރުކާރުގެ ފްލެޓް ކޮމެޓިގައި ތިބި ހައުސިން ސްޓޭޓް މިނިސްޓަރު އަކްރަމް ކަމާލުއްދީނާއި، އަހްމަދު ވިސާން ނަސީމާއި، މުޙައްމަދު އާރިފް، އަދި ލިރުގާމް ވަހީދުގެއެވެ.
އޭސީސީން ބުނީ އެ ފަރާތްތައް އުޅޭތަންތަން ބަލާ ފާސްކުރަމުން ދަނީ ކޯޓް އަމުރެއްގެ ދަށުން ކަމަށެވެ. އަދި އެކަން ކުރަމުން އަންނަނީ އެ ކޮމިޝަނުން ތަހުގީގުކުރަމުން އަންނަ ގެދޮރުވެރިޔާ ސްކީމުގެ 4،000 ފްލެޓު ދޫކުރި ގޮތުގައި މައްސަލާގައިކަމަށެވެ.
4000 ފްލެޓަށް ޝަރުތު ހަމަވާ މީހުންގެ ލިސްޓު މިދިޔަ ސަރުކާރުން އާއްމުކޮށް ފްލެޓްދޭން މަސައްކަތް ފެށުމުން އޭސީސީން ވަނީ އެކަން ހުއްޓުވާފައެވެ.
ދެ މަސްދުވަހަށްވުރެ ދިގު ތަހުގީގަކަށްފަހު އޭސީސީން ބުނީ ގެދޮރުވެރިޔާ ސްކީމްގެ ތެރެއިން ޕްލެޓް ލިބުނުކަމަށް ކުރީގެ ހައުސިން މިނިސްޓްރީން ނިންމި މީހުންގެ ތެރެއިން 60 ޕަސެންޓަކީ ޝަރުތު ހަމަނުވާ މީހުންކަމަށެވެ. އަދި 4،000 ފުލެޓަށް ކުރިމަތިލީ މީހުންނަށް ޕޮއިންޓު ދިނުމުގައި އެއް ހަމައަކުން އަމަލުކޮށްފައިނުވާ ކަމަށްވެސް އޭސީސީން ވަނީ ބުނެފަ އެވެ.
