ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެން ވަޒީރުންގެ މަޖިލިސް އެކުލަވައިލެއްވުމަށް ފަހު މަގާމުތަކަށް އައްޔަންކުރެއްވި ވަޒީރުންގެ ތެރެއިން ތިން ބޭފުޅަކަށް އެމްޑީޕީގެ އަގުލަބިއްޔަތު އޮތް ކުރީގެ މަޖިލީހުން ރުހުން ނުދިނެވެ. އެއީ ބަންޑާރަނައިބު އަހްމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރެވެ.
ތިން ވަޒީރުންނަށް ރުހުން އޮތްތޯ ބެލުމަށް ވަކިވަކިން މިއަދު އެހި ވޯޓުގައި ޝަހީމާއި އުޝާމަށް ރުހުން އޮތް ކަމަށް ފާސްކޮށްފައި ވަނީ ވޯޓުގައި ބައިވެރިވި 87 މެންބަރުންގެ އިއްތިފާގުންނެވެ. ރުހުން ނެތް ކަމަށް އެއްވެސް މެންބަރަކު ވޯޓު ދެއްވާފައެއްނުވެ އެވެ.
އަދި، ހައިދަރަށް ރުހުން ދިނުމަށް ވޯޓު ދިނީ 81 މެންބަރުންނެވެ. އަދި، ރުހުން ނުދިނުމަށް 4 މެންބަރުން ވޯޓު ދީފައިވެ އެވެ.
މި ތިން ވަޒީރުންނަށް ކުރީގެ މަޖިލީހުން ރުހުން ނުދިނުމުން ހަމަ އެދުވަހު އަލުން ވަނީ އެ ވަޒީރުން ކުރިން ތިބި މަގާމަށް އައްޔަންކޮށް ރައީސް މުިިއއްޒު ވަނީ ފަތްކޮޅު އަރުވާފައެވެ. އަދި އެ ވަޒީރުން މިހާތަނަށްވެސް ތިއްބެވީ މަަގާމުގައެވެ.
