އިސްލާމިކް މިނިސްޓަރ މިހެން ވިދާޅުވީ، އެކްގައި ކުރެއްވި ޕޯސްޓެއްގަ އެވެ.
މި ޕޯސްޓްގައި ބުނެފައި ވަނީ، ތިން ވަނަ ދައުރަކަށް ބޮޑުވަޒީރު މޯދީ ހުވާ ކުރުމުގެ ރަސްމިއްޔާތުގައި ރައީސް ޑރ. މުއިއްޒު ބައިވެރިވެވަޑައިގަތުން އަންގައިދެނީ އިންޑިޔާ އާއި ރާއްޖޭ އާއި ދެމެދުގައި އޮތް ގުޅުން ދެމިއޮތުމަށް ދެފަރާތުން ވެސް އެދޭ މިންވަރު ކަމަށެވެ.
މީގެ އިތުރުން، މިނިސްޓަރު ވަނީ، އިންޑިއާ ގެ އާ ސަރުކާރަށް މަރުހަބާ ދަންނަވާފަ އެވެ.
އިންޑިއާގެ ބޮޑުވަޒީރު ނަރެންދުރަ މޯދީ، ވެރިކަމުގެ ހުވާ ކުރެއްވީ އިންޑިއާގެ ރިޔާސީ ގަނޑުވަރު ރާޝްތުރަޕަތީ ބަވަންގައި ބޭއްވި ރަސްމިއްޔާތެއްގަ އެވެ.
އަދި މި ރަސްމިއްޔާތުގައި ކެބިނެޓުގެ މެންބަރުން ވެސް ހުވާކުރެއްވި އެވެ.
މޯދީ މަގާމުގެ ހުވާކުރެއްވުމަށް ބޭއްވި ރަސްމިއްޔާތަށް ވަޑައިގެންނެވި ބޭރު ގައުމުތަކުގެ ވެރިންގެ ޝަރަފުގައި އެ ގައުމުގެ ރައީސް ދެއްވި ބެންކުއެޓްގައި ވެސް ރައީސް މުއިއްޒު ބައިވެރިވެވަޑައިގަތެވެ. އެ ރިސެޕްޝަންގައި ބޮޑުވަޒީރު މޯދީގެ އެންމެ އަރިހުގައި ހުންނެވި އެއްބޭފުޅަކީ ވެސް ރައީސް މުއިއްޒެވެ. ދެން ހުންނެވީ ސްރީ ލަންކާގެ ރައީސް ރަނިލް އެވެ.
ރައީސް މުއިއްޒު މި ރަސްމިއްޔާތަށް ވަޑައިގެންނެވީ މޯދީގެ ހާއްސަ ދައުވަތަކަށެވެ. މިއީ ރައީސް މުއިއްޒު އިންޑިއާއަށް ކުރެއްވި ފުރަތަމަ ދަތުރުފުޅެވެ.
ރައީސް މުއިއްޒު އިންޑިއާގެ ބޮޑުވަޒީރު ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގެންފައިވަނީ މި ސަރުކާރު އައި ފަހުން ރާއްޖެ އާއި އިންޑިއާގެ ގުޅުން ގޯސްވެފައި ވަނިކޮށެވެ. ރައީސްގެ ދަތުރުފުޅާއެކު ދެ ގައުމުގެ ގުޅުން ބަދަހިވާނެ ކަމަށް ބެލެވެ އެވެ.
