ޖޭއެސްސީގެ ރައީސްކަމުގެ މަގާމަށް، ރައްޔިތުންގެ މަޖިލީހުގެ މެންބަރުންގެ ތެރެއިން އެ ކޮމިޝަން ތަމްސީލް ކުރައްވާ މާފުށީ ދާއިރާގެ މެންބަރު ހުސެއިން ރިޒާ އިންތިހާބުކުރީ މިއަދު އޮތް ޖޭއެސްސީގެ ބައްދަލުވުމުގައެވެ.
ޖޭއެސްސީގެ މެންބަރު ކަމަށް ރިޒާ، މަޖިލީހުން ކަނޑައެޅުއްވީ މިދިޔަ ހަފްތާގައެވެ. އަދި އެގޮތަށް މަޖިލީހުން ކަނޑައެޅުއްވުމުން، ރައީސް ޑރ. މުހައްމަދު މުއިއްޒުވަނީ ޖޭއެސްސީގެ މެންބަރު ކަމަށް ގާނޫނުގައިވާ ގޮތުގެ މަތިން ރިޒާ އައްޔަން ކުރައްވާފައެވެ.
ގިނަ ދުވަސްތަކެއް ވަންދެން ޖުޑީޝަރީގައި މަސައްކަތް ކުރައްވާފައިވާ ރިޒާއަކީ މިސްރުގެ އަލްއަޒްހަރު ޔުނިވާސިޓީން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އޭނާވަނީ ކުރިމިނަލް ކޯޓުގައި ކުރިން މަސައްކަތްކުރައްވާފަ އެވެ.
ޖޭއެސްސީގައި މަޖިލީހުގެ ރައީސް ވެސް އިންނަވަ އެވެ. މަޖިލީހުން ކަނޑައަޅާ އާންމު މީހަކާއި ބަންޑާރަ ނައިބާއި ރައީސް ކަނޑައަޅުއްވާ މެންބަރަކާއި ސުޕްރީމް ކޯޓާއި ހައިކޯޓުން ކަނޑައަޅާ މެންބަރެއް ވެސް ޖޭއެސްސީގައި އިންނަވާނެ އެވެ. ޖޭއެސްސީގެ ރައީސްކަމަށް ރިޒާ މިއަދު އިންތިހާބު ކުރިއިރު، އެ ކޮމިޝަންގެ ނައިބު ރައީސްއަކީ ހައިކޯޓުގެ ފަނޑިޔާރު މުހައްމަދު ނިޔާޒްއެވެ.
