މި މައްސަލާގައި 3 މީހެއްގެ މައްޗަށް ވަނީ ދައުވާކޮށްފައެވެ. އެއީ ދަފްތަރު ނަންބަރު ރސ 12966، އިބްރާހީމް ރަޝީދު، ތ. ވޭމަންޑޫ، ރެދިންގެ، ނިޝާނީ އަލީ އަދި އދ. ރަތަފަންދޫ، ވެލީގެ، އައިސަރު ނަސީމްއެވެ.
މި މީހުން ހައްޔަރުކުރީ ޓެލެގްރާމުގައި "ޖަޒީރާ އެޑްމިން" ގެ ނަމުގައި ޔޫސާއެއް ހަދައި އެ އެޕްލިކޭޝަނުގައި "ޖަޒީރާ" އާއި "ޖަޒީރާ ގާލްސް" އާއި "ޖަޒީރާ އެސްކޯޓު ގެލެރީ" ނަމުގައި ތިން ޗެނަލެއް އުފައްދައިގެން މަސްތުވާތަކެއްޗާއި ހަށި ވިއްކުމުގެ ވިޔަފާރި އިޝްތިހާރު ކުރަމުން ދިޔަ ކަމުގެ ތުހުމަތުގައެވެ.
މި ތިން މީހުންގެ ތެރެއިން އިބްރާހިމް ރަޝީދުގެ މައްޗަށް ހަތަރު ދައުވާ ވަނީ އުފުލާފައެވެ. އެއީ ހަޑި ހުތުރު އެއްޗެއް ރައްދު ކުރުމުގެ ކުށުގެ ދައުވާ، މަނީ ލޯންޑްރިންގެ ދައުވާ، މީހަކު ލައްވާ ހަށި ވިއްކުވުމުގައި އެހީތެރިވެދިނުމުގެ ކުށުގެ ދައުވާ ގެ އިތުރުން މީހަކު ހަށި ވިއްކައިގެން ލިބޭ އާމްދަނީ ކަން އެނގި ހުރެ ބޭނުން ކުރުމުގެ ކުށުގެ ދައުވާއެވެ.
އަނެއް ދެ މީހުންކަމަށްވާ ނިޝާނީ އަލީ އާއި، އައިސަރު ނަސީމްގެ މައްޗަށްވެސް ހަތަރު ދައުވާއެއް ވަނީ އުފުލާފައެވެ. އެއީ ހަޑި ހުތުރު އެއްޗެއް ރައްދު ކުރުމުގެ ކުށުގެ ދައުވާ، މަނީ ލޯންޑްރިންގެ ދައުވާ، މަސްތުވާތަކެތި ބޭނުން ކުރުމަށް ހިތްވަރު ދިނުމަށް އިޝްތިހާރު ކުރުމުގެ ކުށުގެ ދައުވާ، އަދި އެހެން މީހަކު ހަށި ވިއްކައިގެން ލިބޭ އާމްދަނީކަން އެނގިހުރެ ބޭނުން ކުރުމުގެ ކުށުގެ ދައުވާއެވެ
