ޝިމާ ގެއްލުނީ 2019 ވަނަ އަހަރުގެ ފެބްރުއަރީ މަހުގެ 22 ވަނަ ދުވަހުގެ ރޭ ލ. ފޮނަދޫއިން މާމެންދުއަށް ދަތުރުކުރަނިކޮށެވެ. ޝިމާ ގެއްލުނީ އޭނާގެ އެކުވެރިއެއް ކަމަށްވާ އިބްރާހިމް ފަޒީލާ އެކު ދަތުރުކުރަނިކޮށެވެ. ޝިމާ ގެއްލުނީ ޑިންގީ ބަންޑުން ޖަހާލުމުގެ ސަބަބުންކަމަށް ފަޒީލް އޭރުވަނީ ބުނެފައެވެ.
ފުލުހުން މިއަދު ނޫސްވެރިންގެ ބައްދަލުވުމުގައި ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމެންޓްގެ ޗީފް އިންސްފެކްޓާ މުހައްމަދު ސާމިހް ވިދާޅުވީ ޝިމާގެ މައްސަލައިގެ ފައިލް އެއްކޮށް ބަންދުކޮށްފައި ނުވާކަމަށެވެ. އަދި އެ މައްސަލަ އަލުން ރިވިއު ކުރާކަން އޭނާ ވިދާޅުވިއެވެ. އެކަމުގައި ތަފްސީލެއް ނުދެއެވެ.
ޝިމާ ގެއްލިގެން ހޯދުމުގެ މަސައްކަތް ކުރަމުން ދަނިކޮށް އޭނާ ދަތުރުކުރި ކަމަށް ބުނާ ޑިންގީ ވަނީ އެ ހާދިސާ ހިނގިތާ ދެ މަސްދުވަސް ފަހުން ފެނިފައެވެ. އެ ޑިންގީ ފެނުނީ އޭތި ބަންޑުން ޖަހާލިކަމަށް ބުނާ ސަރަހައްދުގެ ކަނޑުގެ އަޑިންނެވެ.
ޝިމާ ހޯދުމަށް 17 ރަށެއް ވަނީ ބަލާފައެވެ. އަދި 9 ސީސީޓީވީ ފުޓޭޖާއި، ވައިގެމަގުން 10 މޭލު ސަރަޙައްދާއި، 1900 އަކަ ކިލޯމީޓަރުގެ ކަނޑުގެ ސަރަޙައްދެއްވެސް ވަނީ ބަލާފައެވެ. އަދި މި މައްސަލައިގެ ތަހުގީގުގައި 46 ފަރާތެއްގެ ބަޔާން ނަގާ، އެ ހުރިހާ މީހުން ދެއްކި ވާހަކަތަކުގެ ތެދު ދޮގު ބަލަމުންދާކަމަށްވެސް ފުލުހުން ވަަނީ ބުނެފައެވެ.
މި މައްސަލައާއި ގުޅިގެން ފުލުހުން ބުނީ ޝިމާއާ އެކު ދަތުރުކުރި ފަޒީލް ދައްކާ ހުރިހާ ވާހަކަތަކަކީ ހަގީގަތެއް ނޫންކަން އެނގޭކަމަށެވެ. އަދި އޭނާ ދީފައިވާ ބަޔާން، އެނަލައިޒްކޮށް، ބަޔާންތަކުގައި އޭނާގެ މިޒާޖު ހުރި ގޮތްތައްވެސް ފަންނީ މާހިރުންގެ އެހީގައި ދިރާސާ ކުރަމުންދާ ކަމަށް ބުނެފައިވެއެވެ.
