ބޮޑު ކަންނެލީ މަސްވެރިންގެ ޔޫނިއަންގެ ފަރާތުން މުޒާހަރާ ކޮށްފައިވަނީ މިފްކޯއިން ބޮޑުކަންނެލި ގަތުމަށާއި ލޭނު އަޅައިގެން މަސްވެރިކަން ކުރުމުގެ ހުއްދަ ދިނުމުގެ ވިސްނުން ސަރުކާރުން ދޫކޮށްލުމަށް ގޮވާލަ އެވެ. މިމަހުގެ 12 ވަނަ ދުވަހު މަސްވެރިން އެންމެ ފުރަތަމަ މުޒާހަރާ ކޮށްފައިވަނީ ހުޅުމާލޭ ފަޅު ތެރޭގަ އެވެ.
ހުޅުމާލޭ ކަންނެލި ޖެޓީ ސަރަހައްދުގައި ފުރަތަމަ މުޒާހަރާ ކުރުމަށް ފަހު، އޮޑިތައް މާލެއަށް މިސްރާބު ޖަހައި މާލޭ ފަޅު ކައިރިއަށް ޖަމާވި އެވެ. ފަހުން މަސްވެރިން ވަނީ ސަލާމަތީ ބާރުތަކަށް ހުރަސްއަޅާ މާލޭގެ އެއް ނަންބަރު ފާލަމަށް ވަދެފަ އެވެ.
ފަޅަށް ވަންނަން އުޅުމުގެ ތެރޭގައި ބައެއް ދޯނިތަކުން ކޯސްޓް ގާޑުގައާއި ފުލުހުންގެ ލޯންޗުތަކުގައި ޖެހޭތަން އެ ދުވަހު އާއްމުވި ބައެއް ވީޑިއޯތަކުން ފެނެ އެވެ. އަދި އެވަގުތު ފުލުހުން އެ ދޯނި މަޑުކުރަން އެންގުމުން ވެސް ފަޅު ތެރެއަށް ވަދެގެން އައި މަންޒަރު ފެނިގެންދެ އެވެ.
ފުލުހުންގެ ލޯންޗުގައި މަސް އޮޑިފަހަރުން ޖެހުނީ ފަޅަށް ވަނަ ނުދިނުމަށް ފުލުހުންގެ އަދި ސިފައިންގެ ލޯންޗުން އޮޑިފަހަރަށް ހުރަސް އެޅުމުންނެވެ. އެދުވަހު މުޒާހަރާގެ ބައިވެރިންގެ ގޮތުގައި އައި 35 ދޯނި ހުއްޓުވޭ ގޮތް ނުވެ ކަނޑިންމައިން އެތެރެވުމުން ސަލާމަތީ ބާރުތަކަށް ފާޑުކިޔުން އަމާޒުވި އެވެ.
މިމައްސަލަ ތަހުގީގު ކުރަމުން ދޭތޯ ސުވާލު ކުރުމުން ފުލުހުން މީޑިއާތަކަށް ދިން ކުރު ޖަވާބުގައި ބުނީ، އެއީ ކަނޑުމަތީ ހާދިސާއެއް ކަމުން މެރިން ޕޮލިހުން މައްސަލަ ތަހުގީގު ކުރަމުން އަންނަ ކަމަށެވެ.
އެކަމަކު، އެ މައްސަލައާ ގުޅޭ އިތުރު އެއްވެސް ތަފުސީލެއް ފުލުހުންނެއް ނުދެ އެވެ.
ހުޅުމާލޭ ކަންނެލި ޖެޓީ ސަރަހައްދުގައި ފުރަތަމަ މުޒާހަރާ ކުރުމަށް ފަހު، އޮޑިތައް މާލެއަށް މިސްރާބު ޖަހައި މާލޭ ފަޅު ކައިރިއަށް 30 ދޯނި އެދުވަހު ޖަމާވި އެވެ. އެ މުޒާހަރާ އިންތިޒާމުކުރީ، ބޮޑު ކަންނެލި މަސްވެރިންގެ ޔޫނިއަނުންނެވެ.