ދ.ކުޑަހުވަދޫގައި ކައުންސިލް ރައީސްކަމަށް ވާދަކުރި ދެ ކެންޑިޑޭޓުންނަކީ ކޮންގްރެސް ޕާޓީއަށް ނިސްބަތްވާ ޖާދުﷲ ހަމީދުއާއި އެމްޑީޕީއަށް ނިސްބަތްވާ އަބްދުﷲ ޖަމީލެވެ. ވަގުތީ ނަތީޖާ ދައްކާގޮތުން ހަމީދު ކައުންސިލް ރައީސްކަން ކާމިޔާބު ކުރައްވާފައިވަނީ 202 ވޯޓުގެ ތަފާތަކުން އެއީ 826 ވޯޓު ލިބިގެންނެވެ. އެގޮތުން ސައްހަ ވޯޓުގެ އަދަދަކީ 1450 ކަމަށްވާއިރު ޖުމްލަ ވޯޓުގެ އަދަދަކީ 1483 އެވެ. އަދި މި ބައި އިލެކްޝަންގައި ވޯޓުލީ 1483 މީހުން ކަމަށްވާއިރު އެއީ އާބާދީގެ 61.84 އިންސައްތަ އެވެ.
މީގެ އިތުރުން ލ.ގަމު ކައުންސިލްގެ މެމްބަރު އިންތިހާބުކުރުމަށް ބޭއްވި ބައި އިލެކްޝަންގައި 250 ވޯޓުގެ ތަފާތާއެކު އިންތިހާބު ކާމިޔާބުކޮށްފައިވަނީ އެމްޑީޕީއަށް ނިސްބަތްވާ އަފްސަލް ޖައުފަރެވެ. އަފްސަލްއާއެކު މި ބައި އިލެކްޝަންގައި ވާދަކުރި ދެވަނަ ކެންޑިޑޭޓަކީ ކޮންގްރެސް ޕާޓީއަށް ނިސްބަތްވާ އަލީ ނަޝީދުއެވެ. އަދި މި ބައި އިލެކްޝަންގައި ސައްހަ ވޯޓުގެ ގޮތުގައި ލިބުނީ 1538 ވޯޓެވެ. މި ރަށުން ވޯޓުލީ މީހުންގެ އަދަދަކީ 1566 މީހުން ކަަމަށްވާއިރު އެއީ ވޯޓުލުމުގެ ހައްގު ލިބިފައިވާ އާބާދީގެ 42.66 އިންސައްތަ އެވެ.
މ.މުލަކު ކައުންސިލްގެ އަންހެން މެމްބަރުން އިންތިހާބުކުރުމަށް ބޭއްވި ބައި އިލެކްޝަންގައި، އެ ބައި އިލެކްޝަން ކާމިޔާބުކުރީ 336 ވޯޓުން އަމިއްލަ ގޮތުން ބައިވެރިވި ކެންޑިޑޭޓް ރީމާ ހުސެއިންއެވެ. ރީމާއާ އެއްކޮށް ދެން ވާދަކުރީ ކޮންގްރެސް ޕާޓީއަށް ނިސްބަތްވާ މިޒްނާ ތައުފީގްއެވެ. އޭނާއަށް ލިބިފައިވަނީ 282 ވޯޓެވެ.
އިއްޔެ ކުރިއަށް ދިޔަ މި ތިން ބައި އިލެކްޝަންސްގައިވެސް ވޯޓުލީ މީހުންގެ އަދަދުތައް މަދުކަން ފާހަގަކޮށްލެވެ އެވެ.
