ދިވެހި ރާއްޖޭގައި ޖުމްހޫރިއްޔާގެ ގާނޫނު އަސާސީގެ 2 ވަނަ ބާބުގައި ކަނޑައަޅާފައިވާ އަސާސީ ހައްގުތަކަކީ ގާނޫނޫ އަސާސީގެ 17 ވަނަ މާއްދާގައި ބަޔާންކޮށްފައިވާ ފަދައިން، އެއްވެސް ތަފާތުކުރުމެއް ނެތި ކޮންމެ މީހަކަށްވެސް ލިބިގެންވާ ހައްގުތަކެއްވާކަން އެޗްއާރްސީއެމްއިން ފާހަގަކުރެ އެވެ. އެގޮތުން ގާނޫނު އަސާސީގެ 23 ވަނަ މާއްދާ ގެ(ހ) އިން ސާފު ފެން ފުދޭ މިންވަރަށް ލިބުމުގެ ހައްގު ކަށަވަރުކޮށްދީފައިވާކަން އެޗްއާރްސީއެމް އިން ބުނެއެވެ.
ފަހަކަށް އައިސް ގާނޫނު ނަންބަރު 6/2006 (ހިއުމަން ރައިޓްސް ކޮމިޝަން)ގެ ގާނޫނުގެ ދަށުން ކޮމިޝަނަށް ހުށަހަޅާފައިވާ އެކި މައްސަލަތަކަށް ބަލާއިރު ފެނުގެ ހިދުމަތް ފޯރުކޮށްދެމުންދާ ކުންފުންޏަށް ގަވައިދުން ބިލް ދައްކަމުންދަނިކޮށް ގޭގެ ވެރިފަރާތުގެ އެދުމުގެ މަތިން ފެނާ މީޓަރުގައި ކުންފުނީގެ ފަރާތުން ތަޅު އެޅުވުމުގެ މައްސަލައާއި ފެނުގެ ހިދުމަތް ފޯރުކޮށްދެމުންދާ ކުންފުންޏަށް އެންގުމަކާ ނުލައި ގޭގެ ވެރިފަރާތުން ފެންމީޓަރުގައި ތަޅު އަޅުވައި ފެނުގެ ހިދުމަތް މެދު ކަނޑާލުމުގެ މައްސަލަތައް އެޗްއާރުސީއެމްއަށް ހުށަހެޅެމުންދާކަން އެ އިދާރާއިން ފާހަގަކުރެ އެވެ.
އެހެންކަމުން އާންމު ފަރުދުންގެ މެދުގަޔާއި، އާންމު ފަރުދުންނާއި އިދާރާތަކާ ދެމެދުގައި ދިމާވާ މައްސަލަތަކުގައި ކަނޑައަޅާފައިވާ ގޮތުގެ މަތިން ގުޅުންހުރި އިދާރާއަކަށް އެ މައްސަލައެއް ހުށަހެޅުމަށާއި ގާނޫނީ އިމުގެ ތެރެއިން ހައްލު ހޯއްދެވުމަށް އެންމެހާ ފަރާތްތަކަށް އެޗްއާރުސީއެމް އިން އިލްތިމާސްކުރެ އެވެ.
