ދައުލަތުގެ މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމުގައި މިނިސްޓަރު ވިދާޅުވީ އުފަންވާ ރޭޓް ދަށަށް ދިޔުމުގެ މައްސަލަ ދުނިޔޭގެ އެހެނިހެން ގައުމުތަކަށް ވެސް ކުރިމަތިވެފައިވާ ކަމަށާއި، އެފަދަ ގައުމުތަކުން މިހާރު އެކަމަށް ފިޔަވަޅުތަކެއް އަޅަމުން އަންނަ ކަމަށެވެ.
އެގޮތުން އުފަންވާ ކުދިންނަށް އެކި ކަހަލަ އިނާޔަތްތައް ދެމުންގެންދާކަން ފާހަގަކުރައްވައި މިނިސްޓަރު ވިދާޅުވީ ވަޒީފާ އަށް ދާ މީހުންގެ ކުދިން ބެލޭނެ އިންތިޒާމު ގައުމުތަކުގައި ހަރުދަނާ ކުރަމުން އަންނަ ކަމަށެވެ.
އެންމެ ފަހުން 2022 ގައި ކުރިއަށް ގެންދިޔަ ބޯހިމެނުމުގެ ނަތީޖާ އަށް ރިއާޔަޔްކޮށް، މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފައިވާ ގޮތުގައި 2014 ގައި ބޯހިމެނި އިރު، ރާއްޖޭގެ އާބާދީ އަކީ 338434 ގައެވެ. އަދި 2022 އަހަރުގެ ތަފާސްހިސާބުތަކުން ދައްކާ ގޮތުގައި އާބާދީ އަކީ 382751 އެވެ.
އެހެންވެ އެންމެ ފަހުން ބޯހިމެނުން ކުރިއަށް ގެންދިއުމާ ދޭތެރޭގައި ދިޔަ އަށް ތެރޭގައި އާބާދީއަށް އިތުރުވީ 44317 މީހުންނެވެ. އެއީ އެވްރެޖްކޮށް އަހަރަކު 5500 ކުދިންނެވެ.
ހަމަމިއާއެކު މި މުއްދަތުގައި ރާއްޖޭގެ ދޮށީ އުމުރުގެ އާބާދީ އިތުރުވެގެންދާނެ އެވެ. މިހާރު އޮތް ގޮތަށް އޮވެއްޖެނަމަ ރިޓަޔާވާ ބޮޑު އާބާދީއަކާއެކު މަސައްކަތްކުރާ އުމުރުގެ އާބާދީ ކުޑަވުމުގެ ސަބަބުން ގައުމުގެ ހިންގުމަށް ބުރަ ބޮޑުވެގެންދާނެކަމުގެ ކަންބޮޑުވުން އެކިފަރާތްތަކުން ދަނީ ފާޅުކުރަމުންނެވެ.
ރާއްޖޭގެ އާބާދީ މިހާރު އިތުރުވަމުން ނުދަނީ މީގެ ކުރީ ސަރުކާރުތަކުން އާބާދީ ބޮޑުތަނުން ކޮންޓްރޯލު ކުރުމަށް ގެންގުޅުނު ބައެއް ސިޔަސާސަތުގެ ސަބަބުން ކަމަށް ލަފާކުރެވެ އެވެ.
