ވޯލްޑް ބޭންކުން ބުނީ ރާއްޖެ، ނޭޕާލް އަދި ސްރީލަންކާއަށް ކަނޑައެޅި ސިސްލެން ރަސްމީކޮށް މަގާމާ ހަވާލުވެ ވަޑައިގަންނަވާނީ އަންނަ މަހުން ފެށިގެން ކަމަށެވެ. މީގެކުރިން އެ މަގާމުގައި ހުންނެވީ ފާރިސް ހަދާދު-ޒެރްވޯސް އެވެ.
ސިސްލެން އެންމެފަހުން މަސައްކަތް ކުރެއްވީ ލެޓިން އެމެރިކާ އަދި ކެރިބިއަން ސަރަހައްދުގެ ޕްރެކްޓަކްސް މެނޭޖަރަކަށެވެ. އެމެރިކާ އަދި އިޓަލީގެ ރަށްވެހިކަން އޮންނަ ސިސްލެން ވަނީ ދުނިޔޭގެ އެކި ސަރަހައްދުތަކުގައި މަސައްކަތް ކުރައްވާފަ އެވެ. އޭނާ ވޯލްޑް ބޭންކާ ގުޅިވަޑައިގަތީ 2001 ވަނަ އަހަރު އެވެ.
ސިސްލެން ވިދާޅުވި ގޮތުގައި ރާއްޖެ، ނޭޕާލް އަދި ލަންކާގެ ކަންޓްރީ ޑިރެކްޓަރުގެ ހައިސިއްޔަތުން ގައުމުތަކުގެ ސަރުކާރުތަކާއި ތަރައްގީގެ ދާއިރާތަކުގައި ހަރަކާތްތެރިވާ ފަރާތްތަކާ އަދި ގުޅުންހުރި އިތުރު ފަރާތްތަކާ އެކު މަސައްކަތް ކުރައްވާނެ ކަމުގަ އެވެ. އެގޮތުން އަވަސް ހަރުދަނާ ކުރިއެރުންތައް ހޯދުމަށް މަސައްކަތް ކުރައްވާނެ ކަމަށް ސިސްލެން ވިދާޅުވި އެވެ.
