ޔޫރޯގެ ގްރޫޕް އޭގައި ސްކޮޓްލަންޑާ ސްވިޒަލަންޑްގެ މެޗު ރޭ އެއްވަރުވީ އެއް ލަނޑު އެއް ލަނޑުންނެވެ. މި ނަތީޖާއާއެކު ސްވިޒަލެންޑުން މި ފަހަރުގެ ޔޫރޯ ފުޓްބޯޅަ މުބާރާތުގެ ދެ ވަނަ ބުރުގެ ޖާގަ އަކާ ދިމާލަށް މިސްރާބު ޖަހާފައެވެ.
ދެ މެޗުން ސްވިޒަލަންޑަށް ހަތަރު ޕޮއިންޓް ލިބިފައިވާއިރު، މިގްރޫޕު ލީޑު ކުރަނީ ހަ ޕޮއިންޓާއެކު ޖަރުމަނެވެ. ދެވަނައިގަ ހަތަރު ޕޮއިންޓާއެކު ސްވިޒަލަންޑް އޮތްއިރު، ތިންވަނައިގަ ސްކޮޓްލަންޑް އޮތީ އެންމެ ޕޮއިންޓަކާއެކުއެވެ. ފުލުގައި އޮތް ހަންގޭރީއަކަށް ޕޮއިންޓެއް ނުލިބެއެވެ. ހަންގޭރީއަށް ދެން ދެވަނަ ބުރުގެ ފުރުސަތެއް ލިބުމަކީ ނާދިރު ކަމެކެވެ.
ރޭ ސްކޮޓްލަންޑާ ސްވިޒަލަންޑްގެ ކުރިމަތިލުމަކީ ރަސްމީ މުބާރާތެއްގައި މި ދެ ޓީމުގެ ފުރަތަމަ ކުރިމަތިލުމެވެ.
ކޮލޯން ސްޓޭޑިއަމްގައި ރޭ ކުޅުނު މެޗު ފަށައިގެން 13 ވަނަ މިނިޓްގައި، ސްކޮޓްލެންޑުން ލީޑުނެގީ މެންޗެސްޓަ ޔުނައިޓެޑަށް ކުޅޭ ސްކޮޓް މެކްޓޮމިނޭ ބޮލުން ޖެހި ލަނޑުންނެވެ. ސްވިޒަލެންޑުން އެއްވަރު ކުރީ ޒެރްޑަން ޝަގީރީ ޖެހި މޮޅު ގޯލުންނެވެ.
ގްރޫޕް އޭގައި ކޮންމެ ޓީމެއްވެ ދެ މެޗު ކުޅުނު އިރު ދެން ކޮންމެ ޓީމަކަށްވެސް އޮތީ މި ބުރުގައި ބާކީ އެއް މެޗެވެ. ފަހު މެޗުތަކަށް ބަލާއިރު، ޖަރުމަނު ނުކުންނާނީ، ސްވިޒަލެންޑާ ދެކޮޅަށެވެ. އަދި ސްކޮޓްލެންޑުން ނުކުންނާނީ ހަންގޭރީއާ ދެކޮޅަށެވެ.
