ސްޕެއިންއާ، އިޓަލީ ބުރާސްފަތި ދުވަަހުގެ ރޭ ކުޅުނު މެޗުން ސްޕެއިން އެއް ލަނޑު ސުން ލަނޑުން މޮޅުވިއިރު، މެޗުގެ ހަމަ އެކަނި ލަނޑަކީ އިޓަލީގެ ރިކާޑޯ ކަލަފިއޯރީ އަތުން ބައިކޮޅަށް ވަތް ލަނޑެވެ.
އެންމެ ފަހުގެ ފައިނަލްގައި އިންގްލަންޑް ބަލިކޮށް މުބާރާތުގެ ތަށި ހޯދި އިޓަލީ އަތުން ބައިކޮޅަށް ވަތް ލަނޑާއެކު، ތިން ފަހަރު ޗެމްޕިއަންކަން ހޯދައިފައިވާ ސްޕެއިން ދެވަނަ ބުރު ޔަގީން ކުރީ ގްރޫޕް ސްޓޭޖުގައި ބާކީ އެއް މެޗު އޮއްވަ އެވެ.
މި ގްރޫޕުގެ ކޮންމެ ޓީމަކުންވެސް މިހާތަނަށް ދެ މެޗު ކުޅެފަައިވާއިރު، ސްޕެއިން ހަ ޕޮއިންޓާއެކު ދެވަނަ ބުރު ޔަގީންކޮށްފައިވާއިރު ދެވަނައިގަ އޮތީ އިޓަލީއެވެ. އެއީ ތިން ޕޮއިންޓާއެކުއެވެ. ފަހު މެޗުތަކުގެ ނަތީޖާގައި ސްޕެއިން އަދި އިޓަލީ ޕޮއިންޓްގެ ގޮތުން އެއްވަރުވިޔަސް، އިޓަލީ- ސްޕެއިން މެޗުން ސްޕެއިން މޮޅުވުމުން ހެޑްސް ޓު ހެޑްސް އުސޫލުން ކުރި ލިބޭނީ ސްޕެއިނަށެވެ.
މި ގްރޫޕުގައި ދެން ހިމެނެނީ ކްރޮއޭޝިއާ އަދި އަލްބޭނިއާއެވެ. ފަހު މެޗުތަކުގައި އިޓަލީ ކްރޮއޭޝިއާއާ ދެކޮޅަށް ނުކުންނައިރު، ސްޕެއިން ނުކުންނާނީ އަލްބޭނިއާއާއެވެ. ފަހު މެޗުތަކުގެ ނަތީޖާއާއެކު، މި ގްރޫޕުގެ ދެވަނަ ހޯދުމުގެ ފުރުސަތު އިޓަލީ، އަލްބޭނިއާ އަދި ކްރޮއޭޝިއާއަށްވެސް އެބައޮތެވެ. ކްރޮއޭޝިއާ އަދި އަލްބޭނިއާ ކޮންމެ ޓީމަކަށްވެސް ދެ މެޗުން ލިބުނީ އެއް ޕޮއިންޓެވެ. ލަނޑުގެ ތަފާތުން ފުލުގައި އޮތީ ކްރޮއޭޝިއާއެވެ.
ދެވަނަ ބުރުން ސްޕެއިން ފުރުސަތު ހޯދާފައިވާއިރު، ދެވަނަ ބުރުގެ ފުރުސަތު ދެން ހޯދާފައިވަނީ މުބާރާތް ބާއްވާ ގައުމުކަމަށްވާ ޖަރުމަނުންނެވެ.
