ހުކުރު ދުވަހުގެ ރޭ ޕޮލެންޑް އަތުން އޮސްޓްރިއާ މޮޅުވީ ތިން ލަނޑު އެއް ލަނޑުންނެވެ. މި ނަތީޖާއާއެކު ދެ މެޗުން ބަލިވެ ޕޮލެންޑަށް މުބާރާތުގައި ކުރިއަށް ދިޔުމުގެ ފުރުސަތު ހަނިވިއިރު، އޮސްޓްރިއާއަށްވަނީ ކުރިއަށް ދިޔުމުގެ އުއްމީދު އާވެފައެވެ.
ހުކުރު ދުވަހުގެ ރޭ އޮސްޓްރިއާއިން ޕޮލެންޑް ކޮޅަށް ފުރަތަމަ ލަނޑު ޖެހީ، ޑިފެންޑަރ ގާނޮޓް ޓުރައުނާ އެވެ. ޕޮލެންޑުން އެއްވަރުކުރި ލަނޑު ޖެހީ ޕަޔަޓެކްއެވެ. އޮސްޓްރިއާއަށް ދެވަނަ ފަހަރަށް ލީޑް ނަގައިދިނީ ކްރިސްޓޮފް ބައުމްގާޓްނަރ އެވެ. އަދި އޮސްޓްރިއާގެ ފަހު ލަނޑު ޖެހީ ލިބުނު ޕެނަލްޓީއަކުން ކެޕްޓަން މާކޯ އަރނޯޓޮވިކް އެވެ.
މިމެޗުގެ ނަތީޖާއާއެކު ފްރާންސާއި އޮސްޓްރިއާއާއި ނެދަލެންޑްސް ވެސް އޮތީ ތިން ޕޮއިންޓާ އެކުއެވެ. ޕޮއިންޓެއް ނުލިބި އޮތީ ޕޮލެންޑެވެ. ޕޮލެންޑަށް ކުރިއަށް ދިޔުމުގެ އަމިއްލަ ބާރު ނެތްނަމަވެސް، މެތަމެޓިކަލް ހަނި ޗާންސެއް ޕޮލެންޑަށް އަދިވެސް އެބައޮތެވެ.
