ފްރާންސާ ހޮލެންޑް ހުކުރު ދުވަހުގެ ރޭ އެއްވަރުވީ ލަނޑެއް ނުޖެހިއެވެ. މި ނަތީޖާއާއެކު ގްރޫޕުގައި ކޮންމެ ޓީމެއްވެސް ދެ މެޗު ކުޅުނު އިރު ހޮލެންޑް އޮތީ އެއްވަނައިގައެވެ. ދެވަނައިގަ ފްރާންސް އޮތް އިރު މި ދެ ޓީމުން ކުރެ ކޮންމެ ޓީމަކަށްވެސް ހަތަރު ޕޮއިންޓް ލިބިފައިވެއެވެ.
ތިންވަނައިގަ އޮސްޓްރިއާ ތިން ޕޮއިންޓާއެކު އޮތް އިރު، ފުލުގައި ޕޮލެންޑް އޮތީ ކުޅުނު ދެ މެޗުންވެސް ބަލިވެ ޕޮއިންޓެއް ނުލިބިއެވެ. އެހެންކަމުން ބާކީ އޮތް މެޗުން މޮޅުވެގެންވެސް ގްރޫޕުގެ އެކެއް ނުވަތަ ދޭއްގައި ޕޮލެންޑް ލައްވައެއް ނުލާނެއެވެ.
ގްރޫޕުގެ ފަހު މެޗުތައް އެއްވަގުތެއްގައި ކުޅޭއިރު، ފްރާންސް ކުޅޭނީ ޕޮލެންޑާއެވެ. އަދި ހޮލެންޑް ކުޅޭނީ އޮސްޓްރިއާއާއެވެ. މި ގްރޫޕުގައި އެއްވަނަ ދެވަނަ ހޯދުމުގެ ފުރުސަތު ތިން ޓީމަށްވެސް އެބައޮތެވެ.
ލަނޑެއް ނުޖެހި ފްރާންސްއާ ހޮލެންޑް މެޗު އެއްވަރުވީރު މި މެޗުގައި ފްރާންސްގެ ކެޕްޓަން ކީލިއަން އެމްބާޕޭ ނުކުޅެއެވެ. އެމްބާޕޭ ނުކުޅުނީ ފުރަތަމަ މެޗުގައި ނޭފަތް ބިނދި ލިބުނު އަނިޔާއާ ގުޅިގެންނެވެ. އެމްބާޕޭ މި މެޗުގައި އިނީ ބެންޗުގައެވެ.
މި މެޗުގައި ހޮލެންޑުން މެޗުގެ ފަހުކޮޅު ލަނޑެއް ޖެހި ނަމަވެސް ވީއޭއާރުން ނިންމީ އެއީ އޮފްސައިޑު ލަނޑެއް ކަމަށެވެ. މި މެޗުގައި ފްރާންސްގެ ކެޕްޓަން ބޭންޑް އަޅައިގެން ކުޅުނު އެންޓޯނިއޯ ގްރީޒްމަންއަށް ލަނޑު ޖަހާނު ރަނގަޅު ހުސް ފުރުސަތުތަކެއް ލިބި ބޭކާރު ވެގެން ދިޔައެވެ.
