ދައުލަތުގެ މީޑިއާއަށް ދެއްވި އިންޓަވިއުއެއްގައި ހޯމް މިނިސްޓަރު އަލީ އިހުސާން ވިދާޅުވީ ޑްރަގު ރިހެބިލިޓޭޝަން ސެންޓަރު ހެދުމަށް ޝައުގުވެރިކަން ފާޅުކޮށް ޕްރޮޕޯސަލް ހުށަހަޅި ކުންފުންޏަކީ ދުނިޔޭގެ އެހެން ގައުމުތަކުގައި ވެސް އެ ފަރުވާ ދިނުމަށް ސެންޓަރުތައް ގާއިމުކޮށް ހިންގަމުން އަންނަ ކުންފުންޏެއް ކަމަށެވެ.
މިނިސްޓަރު ވިދާޅުވީ އެ ކުންފުނިން ހުށަހަޅާފައިވާ އަގު ބޮޑު ކަމަށް ފެންނާތީ އެކަމުގައި މަޝްވަރާތައް ކުރިއަށްދާ ކަމަށެވެ.
އިހުސާން ވިދާޅުވީ، ރާއްޖޭގައި މަސްތުވާތަކެތި ބޭނުންކުރާ ފަރާތްތަކަކީ އެހާ ފޯރުންތެރި ބައެއް ނޫން ކަމަށެވެ. އެހެންކަމުން އެ ކަމަށް ހައްލެއް ގެނެވޭނެ ގޮތެއް ބަލަމުންދާ ކަމަށް ވިދާޅުވިއެވެ. އެގޮތުން އެންޑީއޭގެ ބަޖެޓުން ނުވަތަ އާސަންދައިގެ ތެރެއިން ފަރުވާ ދެވޭނެ ނިޒާމެއް އޮތްތޯ ބަލަމުންދާ ކަމަށް ވިދާޅުވި އެވެ.
ސަރުކާރުން މިވަގުތު ތިން ރިހިބިލިޓޭޝަނެއް ހިންގަމުން ދަނީ ކ. މާފުށީގައި އާއި ހުޅުމާލޭގެ އިތުރުން މާލޭގައެވެ. މީގެއިތުރުން ނ. ވެލިދޫ، ކ. ކާށިދޫ އަދި ލ. އަތޮޅުގައި މިފަދަ ސެންޓަރުތަކެއް އެޅުމަށްވެސް ސަރުކާރުން ވަނީ ނިންމާފަ އެވެ.
ރާއްޖޭގައި މަސްތުވާތަކެތި ބޭނުންކުރާ މީހުންގެ އަދަދު 8،000 މީހުންނާ ގާތްކުރާނެ ކަމަށް ތަފާސްހިސާބުތަކުން ދައްކާއިރު މިއީ ގައުމީ ސަލާމަތާ ގުޅިފައިވާ ކަމެއް ކަމަށް މިސަރުކާރުން ގަބޫލުކުރާތީ ނެޝަނަލް ޑްރަގު އެޖެންސީ (އެންޑީއޭ) ވަނީ ހޯމްލޭންޑް ސެކިއުރިޓީ މިނިސްޓްރީގެ ދަށަށް ބަދަލުކޮށްފަ އެވެ. ނިމިދިޔަ ސަރުކާރުގައި އެންޑީއޭ ކުރިން ހިންގަމުން ގެންދިޔައީ ހެލްތު މިނިސްޓްރީގެ ދަށުންނެވެ.
