ޕޯޗުގަލް ދެވަނަ ބުރު ކަށަވަރު ކުރީ، ދެ މެޗުން ހަ ޕޮއިންޓާއެކު ސައްތައިން ސައްތަ މޮޅުގެ ރިކޯޑަކާއެކުއެވެ. ފުރަތަމަ މެޗުގައި ޕޯޗުގަލްއިން ޗެކް ރިޕަބްލިކް ބަލިކޮށް ތިން ޕޮއިންޓް ހޯދާފައިވާއިރު، ތުރުކީ މެޗަށް ނުކުތީ އެ ތިން ޕޮއިންޓާއެކުއެވެ. އަދި ތިނެއް ސުމަކުން ތުރުކީ މައްޗަށް ކުރި ހޯދައި ހަ ޕޮއިންޓާއެކު ދެވަނަ ބުރު ކަށަވަރު ކުރީއެވެ. ފަހު މެޗުގައި ޕޯޗުގަލް ނުކުންނާނީ ޖޯޖިއާއާ ދެކޮޅަށެވެ.
ގްރޫޕް އެފްގެ އެއް ވަނައިގައި ޕޯޗުގަލްއަށް ހަ ޕޮއިންޓް ލިބިފައިވާއިރު، ދެވަނައިގަ ތުރުކީ އޮތީ ތިން ޕޮއިންޓާއެކުއެވެ. ތިން ވަނައިގައި އޮތް ޗެކް ރިޕަބްލިކާއި ހަތަރެއްގައި އޮތް ޖޯޖިއާ މިރޭ އެއްވަރުވިއިރު، އެ ދެ ޓީމަށް ވެސް ވަނީ ޕޮއިންޓެއް ލިބިފަ އެވެ.
ތުރުކީ މެޗުގައި ޕޯޗުގަލްއިން ލީޑު ނެގީ ބެނާޑޯ ސިލްވާ ޖެހި ލަނޑުންނެވެ. ޕޯޗުގަލް އިން ޖެހި ދެ ވަނަ ލަނޑަކީ ތުރުކީގެ ޑިފެންޑަރު، ސާމިތު އަކައިދިން އަތުން ބައިކޮޅަށް ވަން ގޯލެކެވެ. ޕޯޗުގަލް އިން ތިން ވަނަ ލަނޑު ޖެހީ ބްރޫނޯ ފެނާންޑޭޒް އެވެ. މިއީ، ކްރިސްޓިއާނޯ ރޮނާލްޑޯ މުޅިން ހުސްކޮށްލާފައި ދިން ބޯޅައަކުން ފެނާންޑޭޒް ޖެހި ގޯލެކެވެ.
