މިފްކޯގެ މީޑިއާ އޮފިޝަލް އިބްރާހިމް ސައީދު "ސީއެންއެމް" އަށް މިއަދު ވިދާޅުވީ މަސްވެރިންގެ މުޒާހަރާ ކުރިއަށް ދާތީ އައްޑޫ ކޮމްޕްލެކްސްގެ އޮޕަރޭޝަން ވަގުތީ ގޮތުން ވަނީ މެދުކަނޑާލެވިފައި ކަމަށެވެ. މިއަދުގެ ހަވީރު ހަތަރެއްގެ ފަހުން ކޮމްޕްލެކްސްއިން މުވައްޒަފުން ނެރެ، އޮޑިވެރިންނާއި މަސްވެރިންގެ ބެލުމުގެ ދަށަށް ސައިޓް ގެންދާނެ ކަމުގެ އިންޒާރު ދީފައިވާ ކަމަށް އޭނާ ވިދާޅުވި އެވެ.
އިބްރާހިމް ވިދާޅުވެފައި ވަނީ އިއްޔެގެ މުޒާހަރާގައި ބައިވެރިވި މަސްވެރިން ވަނީ ސްޓާފް ކެންޓީން ބަންދުކޮށްފައި ހުއްޓާ ކުޑަދޮރަކުން އެތަނަށް ވަދެ ތަނުގައި ހުރި ކާބޯތަކެތީގެ ބޭނުންކޮށްފައިވާ ކަމަށެވެ. އަދި އެކަމަޑޭޝަން ބްލޮކުން ކަރަންޓު ކަނޑާލުމުގެ ސަބަބުން އޭއެފްސީގެ މުވައްޒަފުން ރޭގައި ނިދާފައި ވަނީ ބޭރުގައި ސަތަރި އަޅައިގެން ކަމަށް އިބްރާހިމް ވިދާޅުވި އެވެ. އޭނާ ވިދާޅުވި ގޮތުގައި މުވައްޒަފުންގެ ކެއިންބުއިމާއި ފާހާނާކުރުން ފަދަ ޒަރޫރީ ބޭނުންތައް ނުފުއްދި އެކަމަށް ހުރަސް އެޅިފައިވާ ކަމުގަ އެވެ.
މިފްކޯގެ މީޑިއާ އޮފިޝަލް ވިދާޅުވީ އެ ކަންކަމުގެ އިތުރުން މަސްވެރިންގެ ޑިމާންޑަކީ އެ ފަރާތްތަކަށް ނުދެވި ހުރި ފައިސާ ވީ އެންމެ އަވަސް މުއްދަތެއްގެ ތެރޭގައި ދެއްކުން ކަމަށެވެ. އީދު ބަންދަށް މިފްކޯއިން 46 މިލިއަން ރުފިޔާ މަސްވެރިންނަށް ދޫކޮށްފައިވާކަން އިބްރާހިމް ފާހަގަކުރެއްވި އެވެ. އީދަށްފަހު ހުޅުވޭ ހަފުތާގައި ނުދެވި ހުރި ފައިސާ ދައްކައި ނިންމަން މަސައްކަތް ކުރެވޭނެ ގޮތްތައް ބަލައި، ސަރުކާރާ އެކު މަޝްވަރާކޮށް ގޮތެއް ހޯދޭނެ ކަމަށް އޭރު ހާމަކޮށްފައިވާނެ ކަމަށް ވެސް އޭނާ ވިދާޅުވި އެވެ. އިބްރާހިމް ވިދާޅުވެފައި ވަނީ އެގޮތުގެ މަތިން އޮޑިވެރިންނަށް މިހާތަނަށް ނުދެއްކިވާ ފައިސާ ވީ އެންމެ އަވަސް މުއްދަތެއްގެ ތެރޭގައި ދޫކުރުމަށް މަސައްކަތް ކުރަމުން އަންނަ ކަމަށެވެ.
މިފްކޯއިން ވަނީ މަސްވެރިން ކުރިއަށް ގެންދާ އިހުތިޖާޖު ވީހާވެސް ސުލްހަވެރިކަމާ އެކު ކުރިއަށް ގެންދިއުމަށް އިލްތިމާސްކޮށްފަ އެވެ. ހާއްސަކޮށް އެ ކުންފުނީގެ މުދަލާއި މުވައްޒަފުންނަށް ލިބިދާނެ ގެއްލުމަކީ މުޅި މަސްވެރިކަމުގެ ސިނާއަތަށް ވެސް ލިބޭނެ ދެރައެއް ކަމަށް މިފްކޯއިން ބުނެ އެވެ. އެ ކުންފުނީގެ މުވައްޒަފުންގެ އިންސާނީ ކަރާމާތަށާއި ޒަރޫރީ ބޭނުންތަކަށް އުނިކަން އަންނަފަދަ ކަންކަން ނުކުރުމަށް އިލްތިމާސްކޮށް މިފްކޯއިން ބުނި ގޮތުގައި މުވައްޒަފުންގެ ހައްގުގައި ކުންފުނިން ކުރަން ޖެހުނު ކޮންމެ މަސައްކަތެއް ކަމާ ބެހޭ ފަރާތްތަކާ ގުޅިގެން ކުރަމުން ގެންދާނެ ކަމުގަ އެވެ.
