އެމްޑީޕީ ޕާލިމެންޓަރީ ގްރޫޕްގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ނާޒިލް ވިދާޅުވީ މީގެ ކުރިން ނިމިދިޔަ އެމްޑީޕީ ސަރުކާރުގައި އެ ނިމިދިޔަ ހަފްތާގެ ފައިސާ، ފެށޭ ހަފްތާ ހޯމަ ދުވަހުގެ ރޭ، ރޭގަނޑު ދަންވަރު 12 ޖަހަންވާއިރަށް އަބަދުވެސް މަސްވެރިންނަށް ލިބިފައި އޮންނާނެކަމަށެވެ.
ނާޒިލް ވިދާޅުވީ މަސްވެރިން ބާނާ މަސްކޮޅު ކިރާލާގެން މެދުވެރިއެއްގެ ރޯލު ސަރުކާރުން އާދާކުރަނީ އެއީ ބަޖެޓުގައި ޖަހާގެން ދޭ ލާރިއެއް ނޫންކަމަށެވެ. އެގޮތުން ސަރުކާރުގެ މަސްކުންފުންޏަކީ މަސްވެރިން ބުރަމަސައްކަތްކޮށްފަ ބާނާގެން އަންނަ މަސްކޮޅު ކިރާފަ ނޫނީ ރާއްޖެއިްނ ބޭރަށް ގެންދަން ބަންދުކޮށްފަ ނުވަތަ އެ ވިއްކާގޮތަކަަށް ވިއްކާލައިގެން އެ ފައިސާ އަނބުރާ މަސްވެރިންނަށް ހޯދައިދޭން އޮންނަ ކުންފުންޏެއްކަމަށެވެ. އެހެންނަމަވެސް ރައްޔިތުންނަށާއި މަސްވެރިންނަކަށް އެ ފައސާއަށް ވާ ގޮތެއް އެއްގޮތަކަށްވެސް ސާފެއް ނޫންކަމަށް ނާޒިލް ފާހަގަކުރެއްވިއެވެ. އަދި ގިނަދުވަސްވެ މަސްވެރިން މިހާރި ސުވާލުކުރަމުންދަނީ ފައިސާއަށް ވީގޮތުގެ ވާހަކަ ކަމަށް ނާޒިލް ވިދާޅުވިއެވެ.
ނިމުނު އެމްޑީޕީގެ ސަރުކާރުގައި ގަވާއިދުން މަސްވެރިންނަށް ފައިސާ ދޭ ކަމަށް މިއަދު އެ ޕާޓީން ބުނި ނަމަވެސް މި ސަރުކާރުން ބުނާ ގޮތުގައި މަސްވެރިންނަށް ފައިސާ ދޫކުރުމުގައި ބޮޑެތި ދަތިތަކެއް ކުރިމަތިވީ ސަރުކާރު ބަދަލުވިއިރު މަސްވެރިންނަށް ދޭންޖެހޭ 200 މިލިއަަނަށްވުރެ ގިނަ ރުފިޔާ ދޫނުކޮށް ހުރުމުންނެވެ.
ފިޝަރީޒް މިނިސްޓްރީން އީދު ޗުއްޓީގެ ކުރިން ބުނެފައިވަނީ ޖޫން 15 ވަނަ ދުވަހުގެ ކުރިން މަސްވެރިންނަށް 46 މިލިއަން ރުފިޔާ ދޫކުރާނެ ކަމަށެވެ. ދޮޅު މަހެއްހައި ދުވަހު ފައިސާ ދޫނުކުރެވި އޮތުމުން ޖުމްލަ 80 މިލިއަނަށްވުރެ ގިނަ ރުފިޔާ މިފްކޯއިން މަސްވެރިންނަށް ދޭންޖެހިފައި އޮތްކަމަށް އެއިރު މިނިސްޓްރީން ބުންޏެވެ.
ނިމުނު ހަފުތާގައި މިނިސްޓްރީން ބުނީ އެ ހަފުތާ ނިމުމުގެ ކުރިން ދޭންޖެހޭ ފައިސާގެ ތެރެއިން 46 މިލިއަން ރުފިޔާ ދޫކޮށް، މި ހަފުތާއިން ފެށިގެން މަސްވެރިންނަށް ދޭންޖެހޭ ފައިސާގެ ބާކީ ހުރި ފައިސާ ދޫކޮށް ހަލާސްކުރާނެ ކަމަށެވެ.
މަސްވެރިން މަސްކިރާތާ 48 ގަޑިއިރު ތެރޭގައި ފައިސާ ލިބޭނެ ނިޒާމެއް ގާއިމުކުރުމަކީ ރައީސް ޑރ.މުހައްމަދު މުއިއްޒުގެ ވައުދުފުޅެކެވެ
