އިޓަލީ ދެވަނަ ބުރަށް ދިޔައީ، ކްރޮއޭޝިއާއާ އެއްވަރުކޮށް ހަތަރު ޕޮއިންޓް ހޯދައިގެން ގްރޫޕުގެ ދެވަނަ ޓީމުގެ ގޮތުގައެވެ. ތިން މެޗުން މޮޅުވެ ސައްތައިން ސައްތަ ރެކޯޑަކާއެކު މި ގްރޫޕުން އެއްވަނަ ހޯދީ ވަރުގަދަ ސްޕެއިންއެވެ. އަދި ކްރޮއޭޝިއާ، ތިންވަނައަށް ދިޔައިރު، އެ ޓީމަށް އޮތީ ތިންވަނައަށްދާ ޓީމުތަކުގެ ތެރެއިން ގަދަ ހަތަރެއްގައި ލައްވާލާތޯ އުއްމީދު ކުރުމެވެ. ކްރޮއޭޝިއާއަށް ލިބުނީ ދެ ޕޮއިންޓެވެ.
ރޭ އިޓަލީއާ ކްރޮއޭޝިއާ އެއްވަރުވީ އެއް ލަނޑު އެއް ލަނޑުންނެވެ. މެޗުގެ ފުރަތަމަ ހާފުގައި ދެ ޓީމުން ކުރެ ޓީމަކަށް ލަނޑެއް ނުޖެހެއެވެ. ދެވަނަ ހާފުގެ ކުރީކޮޅު، އިޓަލީ ކުޅުންތެރިއެއްގެ އަތުގައި ޖެހިގެން ލިބުނު ޕެނަލްޓީއެއް ކްރޮއޭޝިއާގެ ލޫކާ މޮޑްރިޗް އަތުން ނާކާމިޔާބުވީ، އިޓަލީ ކީޕަރު ޑޮނަރުންމާ އެ ޕެނަލްޓީ ދިފާއު ކުރުމުންނެވެ. އެކަމަކު އޭގެ ކުޑަ އިރުކޮޅެއްގެ ތެރޭގައި މޮޑްރިޗްވަނީ ލަނޑެއް ޖަހައި ކްރޮއޭޝިއާއަށް އުއްމީދު ގެނެސްދީފައެވެ. މި ލަނޑާއެކު އުމުރުން 38 އަހަރުގެ މޮޑްރިޗަކީ ޔޫރޯގައި ލަނޑު ޖެހި އެންމެ ދުވަސްވީ ކުޅުންތެރިޔާ އެވެ.
އިތުރު ވަގުތުގެ އަށް މިނިޓްގެ ތެރެއިން ފަހު މިނިޓްގެ ވެސް ފަހު ވަގުތުގައި އިޓަލީ އަށް އެއްވަރުކޮށްދިން ލަނޑު ޖެހީ މަޓެއާ ޒަކާނީ އެވެ. ގަދަ 16 ބުރުގައި އިޓަލީ ކުޅޭނީ ގްރޫޕް އޭގެ ދެ ވަނަ ޓީމު ކަމަށްވާ ސްވިޒަލެންޑާ އެވެ.
