ހާރިޖީ ވުޒާރާއިން ބުނީ ޒަމީރު، ބްލިންކަންއާ އެކު ބޭއްވި ބައްދަލުވުމުގައި ދިފާއީ ގުޅުމާއި ޑިމޮކްރަސީ ހަރުދަނާ ކުރުމާ ގުޅޭގޮތުން ގޮތުން މަޝްވަރާކުރިކަމަށެވެ. އަދި ރާއްޖެ އާއި އެމެރިކާގެ ގުޅުން އިތުރަށް ފުޅާކޮށް، ބައިނަލްއަގުވާމީ އަދި ސަރަހައްދީ ހަމަޖެހުމާއި މެރިޓައިމް ސެކިއުރިޓީ އާއި ސުލްހަ ދެމެހެއްޓުމުގެ މައްޗަށްވެސް ދެ ބޭފުޅުން ވާހަކަ ދެއްކެވިކަމަށް ހާރިޖީ ވުޒާރާއިން ބުނެއެވެ.
ޒަމީރު މިހާރު އެމެރިކާއަށް ކުރައްވަމުން ގެންދަވާ ދަތުރުގައި ޔުނައިޓެޑް ސްޓޭޓްސް އެޖެންސީ ފޯ އިންޓަނޭޝަނަލް ޑިވެލޮޕްމެންޓް (ޔޫއެސްއެއިޑް) ގެ އެޑްމިނިސްޓްރޭޓާ ސަމަންތާ ޕަވާ އިއްޔެ ވަނީ ބައްދަލުކުރައްވާފައެވެ. އަދި އިއްޔެގެ ބައްދަލުވުމަކީ ވަރަށް މުހިއްމު މަޝްވަރާތަކެއް ކުރިކަމަށް ހާރިޖީ ވުޒާރާއިން ވަނީ ބުނެފައެވެ.
ޔޫއެސްއެއިޑް މެދުވެރިކޮށް މިހާރު ރާއްޖެއަށް ދެމުންދާ އެއްބާރުލުމަށް ޝުކުރު އަދާކުރައްވައި، ކުރިއަށްއޮތްތަނުގައި އެއްބާރުލުން އިތުރުކުރުމަށް ވައުދުވެވަޑައިގެންފައިވާކަމަށް ހާރިޖީ ވުޒާރާއިން ބުނެއެވެ.
މިނިސްޓަރު ޒަމީރު އެމެރިކާއަށް ކުރައްވާ ރަސްމީ ދަތުރުފުޅަކަށް ފުރާވަޑައިގެންފައިވަނީ މިދިޔަ ބުރާފަތިދުވަހުގަ އެވެ. ފޮރިން މިނިސްޓްރީން ބުނީ މި ދަތުރުފުޅުގައި އެމެރިކާގެއެހީދޭ ޖަމާއަތްތަކާއި މިނިސްޓަރު ބައްދަލުކުރައްވާނެކަމަށާއި ރާއްޖެ އާއި އެމެރިކާގެ ގުޅުން އިތުރަށް ބަދަހިކުރުމަށްވެސް މަޝްވަރާކުރެވިގެންދާނެކަމަށެވެ.
ވަޒީރު ޒަމީރު މި ދަތުރުގައި ވޮޝިންޓަން ޑީސީގައި އުޅޭ ދިވެހިންގެ އިތުރުން ނިއުޔޯކާއި ނިއު ޖާޒީގައި ދިރިއުޅޭ ދިވެހިންނާވެސް ބައްދަލުކުރަންވެސް ހަމަޖެހިފައިވެ އެވެ.