މި ގަރާރު މަޖލީހަށް ހުށައެޅީ ރައްޔިތުން މަޖިލީހުގެ ޕީއެންސީ މެމްބަރު ބާރަށު ދާއިރާގެ މެމްބަރު ޝުޖާއުއެވެ.
ޝުޖާއު ހުށައެޅުއްވީ ރައްޔިތުންގެ މަޖިލީހުގެ މެންބަރުންގެ ޢަދަދު ކޮންމެ 5 އަހަރަކުން އިތުރުވަމުންދާ ދިއުމާ މެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށަހަޅާ ޤަރާރު މިހެންނެވެ.
މި ގަރާރުގެ ފުރަތަމަ ކިޔުން އިއްވުމަށް މަޖިލީހުގެ މިއަދުގެ ޖަލްސާއަށް ވަނީ އެޖެންޑާކޮށްފައެވެ. ރައްޔިތުން މަޖިލީހުގެ މެމްބަރުން އިތުރުވުން ހިފެހެއްޓުމަށް މަސައްކަތް ކުރާނެކަން މަޖލީހުގެ އިންތިހާބުގައި ސަރުކާރު ހިންގާ ޕީއެންސީ ވަނީ ބުނެފައެވެ.
މިދިޔަ ދައުރުގައި ރައްޔިތުން މަޖިލީހުގައި ތިއްބެވީ 87 މެމްބަރުންނެވެ. މި އަހަރު އެ އަދަދު ވަނީ 93 އަރާފައެވެ.
ރައްޔިތުންގެ މަޖިލީހުގެ މެމްބަރުކަން ކުރައްވާފައިވާ ބޭފުޅުންނަށް ދޭ އިނާޔަތްތައް ކަނޑާލަން މަަސައްކަތް ކުރައްވާނެ ކަމަށް ބާރަށު ދާއިރާގެ މެމްބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވަނީ ވިދާޅުވެފައެވެ.
