ރައްޔިތުންގެ މަޖިލީހުގެ ލާމަރުކަޒީ ކޮމިޓީއަށް އެލްޖީއޭގެ ބޭފުޅުން ތައާރަފުވުމަށް ވަޑައިގެންނެވި ބައްދަލުވުމުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން އެ އިދާރާގެ އިސް ބޭފުޅަކު ވިދާޅުވީ ރަށު ކައުންސިލުތަކާއި ސިޓީ ކައުންސިލުތަކަށް ހާއްސަކޮށް ތަމްރީނާއި ހޭލުންތެރިކަން އިތުރު ކުރުމުގެ ޕްރޮގުރާމުތައް ހޯދުމަކީ ވަރަސް ބޮޑެތި ހަރަދު ހިނގާ ކަމަކަށް ވީ ހިނދު، އެލްޖީއޭގެ ބަޖެޓުން އެކަން ކުރުމަށް ގޮންޖެހުންތަކެއް އެބަހުރި ކަމަށެވެ.
ނަމަވެސް ބައެއް ފަހަރު އަތޮޅު ކައުންސިލުތަކާއި ގުޅިގެން ނުވަތަ އެލްޖީއޭއާއި ވަކިވަކި ރަށު ކައުންސިލުތަކާ ގުޅިގެން ކައުންސިލުތަކަށް ބޭނުންވާ ހާއްސަ ލަފަޔާއި މަޝްވަރާ ދިނުމަށް އެކި ސެޝަންތައް ހިންގާ ކަމަށް އެ އިދާރާއިން ވަނީ ބުނެފައެވެ. އެ އޮތޯރިޓީން ބުނީ ކޮންމެ ދުވަހަކު ވެސް ރަށު ކައުންސިލުތަށް ހާއްސަކޮށް އޮންލައިންކޮށް ތަމުރީނު ދެވޭނެ ގޮތަށް ސެޓަޕު ވެސް ތައްޔާރު ކޮށްފައި ހުންނަ ނަމަވެސް އޮންލައިކޮށް ދޭ ތަމުރީނަކުން އެންމެ ފުރިހަމަ ނަތީޖާ ނުނެރެވޭ ކަމަށެވެ.
އާދަމް ވިދާޅުވީ އޮންލައިންކޮށް ތަމްރީނުތައް ހިންގައިގެން ބޭނުންވާ ނަތީޖާ ވެސް ނުނެރެވޭ ކަމަށެވެ. ނަމަވެސް ކޯސްތައް ފަރުމާކޮށްފައި ހުންނާނީ ކައުންސިލްތަކަށް އަމިއްލައަށް ވެސް ހެދޭ ގޮތަށް ކަމަށް އޭނާ ވިދާޅުވި އެވެ. ފިޒިކަލީ މި ކޯސްތައް ނުހިންގޭތީ އޭގެ މާބޮޑު ފައިދާއެއް ނުކުރާކަން ވެސް އޭނާ އިތުރަށް ފާހަގަކުރެއްވި އެވެ.
މީގެއިތުރުން ކޮންމެ މީހަކު ވެސް ބޭނުންވާ ވަގުތެއްގައި އަމިއްލައަށް ފުރިހަމަ ކުރެވޭ ތަމުރީނު ކޯސްތައް ހިމެނޭ ޕޯޓަލެއް ގާއިމްކޮށްފައިވާ ކަން ފާހަގަކޮށް އެލްޖީއޭއިން ބުނީ ފިޒިކަލީ ބާއްވަން ޖެހޭ ތަމްރީންތައް ނުބޭއްވޭތީ އޭގެން ފައިދާ ކުރަންވީ މިންވަރަށް ފައިދާ ކުރާ ކަމަށް ގަބޫލު ނުކުރާ ކަމަށެވެ.
ބަޖެޓު ތާށިވެ ކައުންސިލަރުންނާއި ކައުންސިލުތަކުގެ މުވައްޒަފުންގެ ތަމްރީނުތަކަށް ގޮންޖެހުންތައް ދިމާވާކަމަށް އެލްޖީއޭއިން ބުނެފައިވާއިރު، ގާނޫނުތަކާއި ގަވާއިދުތަކަށް އަހުލުވެރިނުވުމުގެ ސަބަބުން ކައުންސިލުތަކުގެ އިދާރީ އަދި މާލީ މައްސަލަތައް ނިކުމެ، އެންމެ ރަނގަޅަށް ކައުންސިލުތައް ނުހިންގޭ މައްސަލަތައް އަންނަނީ އިތުރުވަމުންނެވެ.
