މި މަސްވަރާތައް ބާއްވާފައިވަނީ ދުބާއީގައެވެ. ވަޒީރު އަމީން މިވަގުތު ވަޑައިގެން ހުންނެވީ ރަސްމީ ދަތުފުޅެއްގައި ދުބާއީގައެވެ.
އަމީން ވިދާޅުވީ މާލޭގެ މަގުތައް ތޮއްޖެހުމުގެ މައްސަލަ ހައްލުކުރުމަށް، ދުބާއީ ރޯޑްސް އެންޑް ޓްރާންސްޕޯޓް އޮތޯރިޓީ (އާރްޓީއޭ) އާއި ބައްދަލު ކޮށް މަޝްވަރާތަކެއް ކުރިކަމަށެވެ. އެގޮތުން މާލޭ ސަރަހައްދުގެ ތޮއްޖެހުން ހައްލު ކުރަން ކުރެވޭނެ ކަންކަމާއި ޕްލޭންތަކާއި ބެހޭ ވާހަކަތައް ދެކެވުނުކަން ވަޒީރު އަމީން ފާހަގަކުރެއްވިއެވެ. އަދި މި މަޝްވަރާތަކާއި ގުޅިގެން އާރްޓީއޭގެ އެންމެ ފަހުގެ ޓެކްނޮލޮޖީގެ އެހީތެރިކަން ރާއްޖެއަށްް ދިނުމަށް އެ އޮތޯރިޓީން އެއްބެސްވެފައިވާކަމަށް ވަޒީރު އަމީން ވިދާޅުވިއެވެ.
މާލޭގެ މަގުތައް ތޮއްޖެހުން ކުޑަކުރުމަށްް ސަރުކާރާއި ސިޓީ ކައުންސިލް ގުޅިގެން އަންނަނީ މަސައްކަތްތަކެއް ކުރަމުންނެވެ. މިގޮތުން މާލޭގެ މަގުތަކުގައި ޕާކުކޮށްފައިވާ ދުވަސްވީ އުޅަނދުތައް ނަގާ ނަތްތާލުމުގެ މަސައްކަތް ވަނީ ފަށާފައެވެ.
ވެހިކަލް މަދުކުރުމަށްވެސް މަސައްކަތްތަކެއް ވަނީ ފަށާފައެވެ. މި މަސައްކަތުގެ ތެރެއިން، މިހާރު ގެންގުޅޭ ވެހިކަލްތަކުގެ ތެރެއިން ބާވެ ދޫކޮށްލަން ބޭނުންވާ ވެހިކަލްތައް ދޫކޮށްލެވޭނެ ހާއްސަ ޕްރޮގްރާމެއް ގެންނަން ވިސްނަވާކަން ވެސް ވަޒީރު ވަނީ ވިދާޅުވެފައެވެ.
މީގެއިތުރުން ކޮންމެ ރަށަކަށް ރެޖިސްޓްރީ ކުރެވޭނެ ވެހިކަލް ލިމިޓެއް ކަނޑައަޅުމަށް ގަވައިދުތަކަށް ބައެއް އިސްލާހުވެސް ވަނީ ގެނެސްފައެވެ.
