މުސްތަފާ މިތަކެތި އޭނާގެ އެކްސްގައި ހިއްސާކުރައްވާފައި މިވަނީ މި ވެރިކަމުގައި މުލިއާގެ އަށް ފުރަތަމަ އައްޔަންކުރި ފާތިމަތު ޝަމްނާޒް އަލީ ސަލީމް، ރައީސް މުއިއްޒަށް ސިހުރު ހެދިކަމުގެ ތުހުމަތުގައި ހައްޔަރުކޮށްފައި ވަނިކޮށެވެ.
މުސްތަފާ ވިދާޅުވީ ރައީސް ޔާމީނަށްް ވަރަށް ފާޑުފާޑުގެ ސިހުރުހާހޫރަ މީހުން ހެދިކަމަށެވެ. އަދި އޭގެ ތެރެއިން މުލީއާގެ މައިދޮރު އަޑިން އޭނާ ނެގި ސިހުރު ލިޔެފައިވާ އެއްޗެހިތަކެއް ހިއްސާކުރައްވަމުން މުސްތަފާ ވިދާޅުވީ ރައީސުންގެ ފާރަވެރީންގެ ގޮތުގައި ތިބުމަކީ ޒާތެއްގެ ކަމެއްކަމަށެވެ.
މުސްތަފާ ކުރެެއްވި ޕޯސްޓްގައި މިސްކިތެއްގައި ފޯނެއް ހިފައިގެން އިން މީހެއްގެ ފޮޓޯއެއްވެސް ވަނީ ހިމަނާފައެވެ. އެ ފޮޓޯއާއި އެކު މުސްތަފާ ވިދާޅުވީ އެއީ މީހަކު ސިހުރު ހަދާން މިސްކިތެއްގައި އިންތަނެވެ. އެ މީހާގެ ފަހަތުން ދުވެ. ކުރި ކަންކަން ބަރާބަރަށް ބަލާ ފުލުހަށް ރިޕޯޓް ކުރިކަމަށްވެސް މުސްތަފާ ވިދާޅުވިއެވެ. އަދި އެމީހާ އެކަމެއް ކުރާކަން، މިސްކިތުގައި އިންކަން، އެންގީ އިބޫ ދައުރު ފުރިހަމަ ކުރި ވަޒީރެއްކަމަށްވެސް މުސްތަފާ ވިދާޅުވިއެވެ.
އެހެންނަމަވެސް މިސްކިތުގައި އިނީ ކާކުކަމެއް އަދި އެވާހަކަ ބުނި ވަޒީރަކީ ކޮން ބޭފުޅެެއްކަމެއް މުސްތަފާ ވިދާޅެއް ނުވެއެވެ.
ސިހުރު ހެދި ކަމުގެ ތުހުމަތުގައި ޝަމްނާޒް ހައްޔަރުކުރީ މިދިޔަ އާދިއްތަ ދުވަހުއެވެ. ޝަމްނާޒާއި އެކު އޭނާގެ ކޮއްކޮ ހައްވާ ސަނާ އަލީ ސަލީމާއި އިތުރު މީހަކު ހައްޔަރުކޮށް ފުލުހުން އަންނަނީ އެ މައްސަލަ ތަހުގީގުކުރަމުންނެވެ. އަދި މި ތިން މީހުންގެ ބަންދަށް ވަނީ 7 ދުވަސް ޖަހާފައެވެ.
މި މައްސަލަ ފެންމަތިވުމުން، ރައީސް ޑރ. މުހައްމަދު މުއިއްޒުގެ އެންމެ އަރިސް މީހުންގެތެރޭގައި ހިމެނޭ ރައީސް އޮފީހުގެ މިނިސްޓަރު އާދަމް ރަމީޒުވެސް ވަނީ ސަސްޕެންޑްކޮށްފއެވެ. އޭނާއަކީ ޝަމްނާޒުގެ ކުރީގެ ފިރި މީހާއެވެ.
