އެ ބައްދަލުވުމުގައި ފުލުހުން ހިއްސާކުރި މައުލޫމާތުގައި ވަނީ މިދިޔަ އަހަރުތެރޭ ސްކޭމްގެ ޖުމްލަ 1658 މައްސަލަތައް ރިޕޯޓްކުރިކަމަށެވެ. އެ މައްސަލަތަކުގައި ހިމެނޭ ފައިސާގެ އަދަދު 28.4 މިލިއަން ރުފިޔާއަށް އަރައެވެ.
މިއަހަރުގެ ފުރަތަމަ ފަސްމަހު ސްކޭމްގެ 877 މައްސަލަ ވަނީ ރިޕޯޓްކޮށްފައެވެ. އެ މައްސަލަތަކުން 11 މިލިއަނަށްވުރެ ގިނަ ރުފިޔާ ސްކޭމަރުން ވަނީ ފޭރިގަންފައިވާކަން ފުލުހުންގެ ހިސާބުތަކުން ދައްކައެވެ.
މި އަދަދުތަކަށް ބަލާ މިއަހަރި ނިމޭއިރު 49 މިލިއަން ރުފިޔާ ހަމައެކަނި ސްކޭމް ކޮށްގެން ފޭރިގަންނާނެ ކަމަށް ފުލުހުން ބުނެއެވެ.
ފުލުހުންގެ ހިސާބުތަކުން ދައްކާ ގޮތުން އެވްރެޖު ގޮތެއްގައި ސްކޭމް ކޮށްގެން ދުވާލަކު 6 މައްސަލަ ހުށައަޅައެވެ. އެއީ މަހަކު 192 މައްސަލައެވެ.
ފުލުހުންގެ ނަމްބަރުތައް
- ކޮންމެ 51 މިނެޓަކުން ކުށެއް
- ކޮންމެ 131 މިނެޓަކުން ވައްކަމެއް
- ކޮންމެ 180 މިނެޓަކުން ސްކޭމެއް
- ކޮންމެ 480 މިނެޓަކުން ޑުރަގް މައްސަލައެއް
ސްކޭމްގެ އެކި މައްސަލަތަކާއި ގުޅިގެން މިހާތަނަށް 297 ސިމްކާޑު ޓާމިނޭޓު ކޮށްފައިވާކަމަށް ފުލުހުން ބުނެއެވެ. އަދި ސްކޭމް ލާރި ޖަމާވި 500 ބޭންކު އެކައުންޓެއް މިދިޔަ ތިން އަހަރުގެ ތެރޭގައި ބްލޮކްކުރިކަމަށްވެސް ފުލުހުން ބުނެއެވެ.
އެންމެ ގިނައިން ސްކޭމް ކޯލުތައް ކުރަނީ ޖަލުތަކުން ކަމަށް ދާދި ފަހުން ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ. އެހެންކަމުން އެކަން ހުއްޓުވުމަށް ބޭނުންވާ ވަސީލަތްތައް ގާއިމު ކުރާނެކަން އިހްސާން ވިދާޅުވިއެވެ.
ޖަލަށް ވަގަށް މަސްތުވާތަކެއްޗާއި މޯބައިލް ފޯނު ވެއްދުމުގެ ތުހުމަތު ބޮަޑަށް ކުރެވެނީ ޖަލު ބަލަހައްޓާ އޮފިސަރުންނެވެ. އެކަން ކުރާ ނެޓްވޯކެއް ހޯދާ ކަރެކްޝަނުގެ 13 އޮފިސަރަކު ހައްޔަރުކޮށްފައިވާކަން ރޭ ފުލުހުން ވަނީ ހާމަކޮށްފައެވެ
