މިއީ މަކަރާއި ހީލަތުން ފައިސާ ހޯދި މައްސަލައެކެވެ. މި މައްސަލައިގައި ހިމެނޭ ސ. ހިތަދޫ، ދާގަނޑުކެކުރިގޭ، ޝަފީއު ޝިހާބްވަނީ ފޭކް ސްލިޕްތަކެއް ފޮނުވައިގެން ފިހާރައަކުން 172،000 އަށް ވުރެ ގިނަ ރުފިޔާގެ މުދާ ހޯދާފަ އެވެ.
މި މައްސަލައިގައި ކްރިމިނަލް ކޯޓުން މިއަދު އެނާގެ މައްޗަށް ހުކުމް ކުރީ އެއް އަހަރާއި ފަސް މަހަށް ޖަލަށްލައި، އެ ފައިސާ ދައްކާށެވެ.
ޝާފިއުގެ މައްޗަށް ދައުވާ ކޮށްފައިވަނީ ޖޫން، 2022 އިން ފެށިގެން އޮކްޓޫބަރު، 2022 އާ ހަމައަށް އެކި ފަހަރުމަތިން ޅ. ހިންނަވަރުގައި ހުންނަ ފިހާރައަކުން 172،000 އަށް ވުރެ ގިނަ ރުފިޔާގެ މުދާ ނެގުމަށްފަހު ފިހާރައިގެ އެކައުންޓަށް ފައިސާ ޓްރާންސްފާ ކޮށްފައިވާ ކަމަށް ބުނެ ފޭކް ސްލިޕްތަކެއް ފޮނުވި މައްސަލާގައި އެވެ. އެ މައްސަލާގައި އޭނާގެ މައްޗަށް ކުރީ މަކަރާއި ހީލަތް ހެދުމުގެ ދައުވާ އާއި އެނގިހުރެ ސައްހަ ނޫން ލިޔުމެއްގެ ތެދުކަން ދެއްކުމުގެ ކުށުގެ ދައުވާ އެވެ.
