އިދިކޮޅު އެމްޑީޕީ ގައުމީ މަޖިލީހުގެ މާލޭ ދާއިރާގެ ރައީސްކަމަށް މާލޭ ސިޓީ ކައުންސިލްގެ މޭޔަރު އާދަމް އާޒިމް ވާދަކުރަން ނިންމައިފިއެވެ.
Advertisement
އެމްޑީޕީ ގައުމީ މަޖިލިސް އިންތިހާބު އަންނަ މަހުގެ 2ގައި ބާއްވަން ނިންމާ މަގާމުތަކަށް ކުރިމަތިލުމަށް އެޕާޓީން އިއްޔެ ވަނީ ހުޅުވާލާފައެވެ.
ގައުމީ މަޖިލީހުގެ މާލޭ ދާއިރާގެ ރައީސްކަމަށް ކުރިމަތިލާކަން އިއުލާންކުރައްވާ އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ އެ މަގާމަށް ކުރިމަތިލާނީ އެމްޑީޕީގެ ހުރިހާ މެމްބަރުންގެ ބައިވެރިވުމާއި އެކުކަމަށެވެ.
" އުފާވެރި ، އެކުވެރި ބަދަހި ސަފުތަކެށް ރާވާ ހިންގުމުގެ އަޒުމާއެކު، ތަރުތީބު ކުރުމުގެ ގާބިލުކަން ހުރީތީވެ ، ހިތާ ރޫހުން ވާނެކަން ގަބޫލު ކުރެވޭތީ އެމް.ޑީ.ޕީ ގައުމީ މަޖްލީހުގެ މާލޭ ދާއިރާގެ ރައީސްކަމަށް ތިހުރިހާ ބޭފުޅުންގެ ބައިވެރިވުމާއިއެކު ކުރިމަތިލުމަށް ނިންމައިފިން." އާޒިމް އެކްސްގައި ލިޔުއްވާފައިވެއެވެ.
އެމްޑީޕީގެ ގައުމީ މަޖިލީހުން 26 މަގާމަކަށްް ކުރިމަތިލުމުގެ ފުރުސަތު ވަނީ ހުޅުވާލާފައެވެ.
އެމްޑީޕީން ބުނީ ގައުމީ މަޖިލީހަށް ކުރިމަތިލެވޭނީ 1 ޖުލައި 2024 އާއި ހަމައަށް ޕާޓީގެ މެންބަރެއްގެ ގޮތުގައި އިލެކްޝަން ކޮމިޝަނުގައި ދަފްތަރުގައި ވާ ފަރާތްތަކަށެވެ. އަދި ވޭތުވެދިޔަ 5 އަހަރު ތެރޭގައި ޕާޓީގެ އަސާސީ ޤަވާއިދާއި ހިލާފުވެފައި ނުވާ މެންބަރެއްކަށް ވާންޖެހޭނެކަމަށްވެސް އެޕާޓީން ބުނެއެވެ.
ގައުމީ މަޖިލީހުން ހުސްވެފައިވާ ދާއިރާތައް
- މެދު ހެންވޭރު، ހެންވޭރު އުތުރު، ގަލޮޅު އުތުރު، މައްޗަންގޯޅި އުތުރު، މާފަންނު އުތުރު އަދި ހެންވޭރު ހުޅަނގު ދާއިރާގެ ރައީސް
- ހުޅުމާލެ އުތުރު ދާއިރާގެ ރައީސް
- މާލެ ސިޓީގެ ރައީސް
- ހއ. ދިއްދޫ އަދި ހއ. ކެލާ ދާއިރާގެ ރައީސް
- ހދ. މަކުނުދޫ ދާއިރާގެ ރައީސް
- ހދ. ކުޅުދުއްފުށި ދެކުނު ދާއިރާގެ ރައީސް، ކުޅުދުއްފުށި ސިޓީގެ ރައީސް
- ރ. އުނގޫފާރު އަދި ރ. އިނގުރައިދޫ ދާއިރާގެ ރައީސް
- ބ. ތުޅާދޫ އަދި ބ. ހިތާދޫ ދާއިރާގެ ރައީސް
- ޅ. ކުރެންދޫ ދާއިރާގެ ރައީސް
- ކ. މާފުށި އަދި ކ. ހުރާ ދާއިރާގެ ރައީސް
- އދ. ދަނގެތި އަދި އދ. ދާންދޫ ދާއިރާގެ ރައީސް
- ގއ. ކޮލަމާފުށި ދާއިރާގެ ރައީސް
- ގދ. ފަރެސްމާތޮޑާގެ ރައީސް އަދި ތިނަދޫ ސިޓީގެ ރައީސް
- ފޭދޫ ދެކުނު ދާއިރާގެ ރައީސް
މިމަގާމްތަކަށް ކުރިމަތި ލާން ބޭނުންވާ ފަރާތްތަކުން ފޯމު ފުރިހަމަ ކުރުމަށްފަހު މިމަހުގެ 7 ވަނަދުވަހުގެ މެންދުރު 2:00 ގެ ކުރިން ހުށައަޅަންޖެހޭނެކަމަށްް އެމްޑީޕީން ބުނެއެވެ.
