މަތީ ތައުލީމާއި ތަމްރީންގެ ގާނޫނު މިހާރު އޮންނަ ގޮތުން ރާއްޖޭގައި ޔުނިވަސިޓީއަކަށް ބަދަލުކުރެވެން އޮންނަނީ ކޮލެޖެއްގެ ގޮތުގައި މެދުނުކެނޑި ހިންގާތާ 20 އަހަރުވުމުންނެވެ.
މި އިސްލާހު މަޖިލީހަށް ހުށައެޅުއްވީ ސަރުކާރުގެ ފަރާތުން މާފަންނު ދެކުނު ދާއިރާގެ ޕީއެންސީގެ މެމްބަރު އަބްދުﷲ ރިފާއުއެވެ.
އޭނާ ހުށައެޅި އިސްލާހުގައި ބުނެފައިވަނީ ރާއްޖޭގައި ކޮލެެޖެއްގެ ގޮތުގައި ހިންގާތަން މެދުނުކެނޑި 15 އަހަރުވެފައިވާނަމަ ޔުނިވާސިޓީއަކަށް ބަދަލުކުރެވިދާނެކަމަށެވެ. އަދި ބޭރު ގައުމެއްގައި އެ ގައުމެއްގެ ސަރުކާރުން ބަލައިގަން ބޭރުގެ ގައުމެއްގެ ޔުނިވާސިޓީއެއްގެ ގޮތުގައި ރަޖިސްޓްރީވެ 10 އަހަރުވެފައިވާ ތަންތަންވެސް ރާއްޖޭގައި ޔުނިވާސިޓީއެއްގެ ގޮތުގައި ރަޖިސްޓްރީކުރެވޭނެކަމަށެވެ.
މަތީ ތައުލީމް ދިނުމަށް ރަޖިސްޓްރީކޮށްފައިވާ ކޮލެޖެއް ޔުނިވަސިޓީއަކަށް ބަދަލުކުރުމަށް އެދޭއިރު، އެ ކޮލެޖެއްގައި އާޓްސް އެންޑް ހިއުމަނިޓީޒް އާއި އިންޖިނިއަރިން އެންޑް ޓެކްނޮލޮޖީ އާއި ލައިފް ސައިންސް އެންޑް މެޑިސިން އާއި ނެޗުރަލް ސައިންސާއި ސޯޝަލް ސައިންސް ފަދަ ދާއިރާތަކުގެ ތެރެއިން ލެވެލް ހަތެއް އަދި ނުވައެއްގެ މަދުވެގެން ތިން ދާއިރާއަކުން އަމިއްލަ ނުވަތަ ބޭރުގެ ޔުނިވާސިޓީއެއްގެ ޕްރޮގްރާމްތައް ހިންގަން ޖެހޭނެކަމަށްވެސް އެ އިސްލާހުގައިވެއެވެ.
މީގެއިތުރުން އެ ކޮލެޖުގައި މޯލްޑިވްސް ނޭޝަނަލް ކޮލިފިކޭޗަން ފްރޭމްވޯކްގެ ލެވެލް ހަތަކުން ފެށިގެން މަތީ ކޯސްތަކުގައި ކިޔަވަމުންދާ މަދުވެގެން 1،000 ދަރިވަރުން ކިޔަވަމުން ދާން ޖެހޭނެ ކަމަށް ސަރުކާރުން ހުށައެޅި އިސްލާހުގައިވެއެވެ.
ބައިނަލްއަގުވާމީ ފެންވަރުގެ ރިސާޗް މަސައްކަތްތައް ބޭރުގެ ޔުނިވާސިޓީތަކާ އެކު ހިންގުމުގެ ތަޖުރިބާ ލިބިފައިވުމާއި އެކަޑެމިކް ޕްރޮގްރާމްތަކުގައި ކިޔަވައިދޭ މަދުވެގެން 10 އިންސައްތައަކީ ޕީއެޗްޑީ ހާސިލް ކޮށްފައިވާ މުވައްޒަފުންނަށް ވާން ޖެހުމަކީވެސް ކޮލެޖެެއް ޔުނިވާސިޓީއަށް ބަދަލުކުރުމުގެ ޝަރުތެކެވެ.
