ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހަޅާފައިވާ ދައުލަތުގެ ދަރަންޏާ ބެހޭ ބިލަށް ބަހުސް ކުރައްވަމުން ސަލީމް ވިދާޅުވި ގޮތުގައި އޭނާއަކީ ވޭތުވެދިޔަ ތިން ދައުރުގައި ވެސް މާލިއްޔަތު ކޮމިޓީގައި ހިމެނިވަޑައިގެންނެވި އެއް މެމްބަރެވެ.
މިދިޔަ 19 ވަނަ މަޖިލިހުގައި މާލިއްޔަތު ކޮމިޓީ އަށް އަމީރު ވަޑައިގެންނެވުމުން "ތިވަރަށް ދަރަނި ނުނަގަން" އެދިވަޑައިގެން އާދޭސް ދެންނެވި ނަމަވެސް "ބޭނުން ވަރަކަށް ދަރަނި" ނަގާނެ ކަމަށް އަމީރު ވިދާޅުވެ ގޮންޖައްސަވާފައިވާ ކަމަށް ސަލީމް ވިދާޅުވި އެވެ.
އަވަށްޓެރި ސްރީ ލަންކާ ބަގުރޫޓުވުމުން އެކަމުގެ ޒިންމާވާ މީހުން ޖޫރިމަނާ ކުރި ކަމަށް ވިދާޅުވެ، ސަލީމް ފާހަގަކުރެއްވި ގޮތުގައި ރާއްޖޭގައި ޖޫރިމަނާކޮށްގެން އެކަނި މިކަން ބާއްވައިގެން ނުވާނެ އެވެ.
ސަލީމް ވިދާޅުވީ މި ވެރިކަމުގައި، ރައްޔިތުންގެ މަޖިލީހުގައި އޮތް ސުޕަ މެޖޯރިޓީއާ އެކު ގައުމަށް ބަދަލުތަކެއް ގެނައުން މުހިންމު ކަމަށާއި، ހަމައެކަނި ގާނޫނަށް ގެންނަ ބަދަލަކުން ކަންކަން މުޅިން އިސްލާހު ނުވާނެ ކަމަށެވެ.
ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) ގެ މުގައްރިރުކަން ވެސް ކުރައްވާ ސަލީމް ވިދާޅުވި ގޮތުގައި އެމްޑީޕީން ގަބޫލުކޮށްގެން ތިބީ މި ސަރުކާރުގެ ހަ މަސް ދުވަހުގެ ތެރޭގައި ގައުމުގެ ހާލަތު ވަރަށް ދަށު ދަރަޖައިގެ ހާލަތަކަށް ވެއްޓިގެންދާނެ ކަމެވެ. އަދި އެމްޑީޕީ އަށް ދެވަނަ ދައުރެއް ލިބުނު ނަމަ، ވިސްނައިގެން ތިބީ ގައުމުން ބައެއް ވިއްކާލާފައި ދަރަނި ނަގައިގެން ކަންކަން ފޫބައްދަން ކަމަށް ވެސް ސަލީމް ވިދާޅުވިއެވެ.
