މާލެ ސިޓީ ކައުންސިލުން ބުނީ ސާވޭގެ މަސައްކަތަށް ޝައުގުވެރިވާ މީހުން ޖުލައި 19 ވަނަ ދުވަހު އަގު ހުށައެޅުމަށެވެ. ބިޑް ޕްރޮޕޯސަލް ހުށަހަޅަނީ ބަންދުކުރެވިފައިވާ ސިޓީ އުރައެއްގައި ހުށަހެޅި ފަރާތުގެ ނަމާއި، އިއުލާން ނަންބަރު އެނގޭނެހެނެވެ.
އަދި މި އިއުލާނާ ގުޅިގެން އިތުރަށް ކަމެއް ސާފުކުރަން ބޭނުންވާނަމަ ޖުލައި 16ގެ މެންދުރު 12:00ގެ ކުރިން [email protected] އަށް މެއިލް ކޮށްދިނުމަށް ވަނީ އެދިފަ އެވެ.
މިފަހުން ބޭއްވި ނޫސްވެރިންގެ ބައްދަލުވުމެއްގައި މާލޭ މޭޔަރު އާޒިމް ވިދާޅުވީ މާލޭގެ ޓްރެފިކް މައްސަލައަކީ ބޮޑު މައްސަލައެއް ކަމަށާއި އެކަން ހައްލު ކުރުމުގެ މަސައްކަތް ކުރައްވާނެ ކަމަށެވެ.
އަދި އެ މަސައްކަތުގެ ދަށުން މާލޭގައި ދުއްވޭ ވެހިކަލްގެ އަދަދު ކަނޑައަޅަން ނިންމާފައިވާ ކަމަށެވެ.
ކުރީގެ އަހަރުތަކުގެ ތަފާތު ހިސާބަށް ބަލާއިރު ރާއްޖޭގައި އެވްރެޖްކޮށް ދުވާލަކު 44 ސައިކަލު ރަޖިސްޓްރީ ކުރެ އެވެ. މީގެ ތެރެއިން ވެސް 60 ޕަސެންޓަކީ މާލޭގައި ދުއްވަން ރަޖިސްޓްރީ ކުރާ އުޅަނދުތަކެވެ. މިއީ އާދަޔާހިލާފު ގިނަ އަދަދެކެވެ.
ހަތަރު ކިލޯ މީޓަރު ހަމަނުވާ މާލެ އުޅަނދުތަކުން ތޮއްޖެހިފައިވާއިރު، ރާއްޖެ އެތެރެކުރާ ވެހިކަލް ކޮންޓްރޯލް ކުރަން ނިންމާފައިވާ ކަމުގެ އިޝާރާތެއް، ނިމުނު ސަރުކާރުން ވެސް ދިނެވެ. ނަމަވެސް ވެރިކަން ނިމުނީ އެވާހަކަ އެއްގައި ބަހުސްކުރުމުގައި ތިއްބަ އެވެ.
