ބައިނަލްއަގުވާމީ ބޮޑު މުބާރާތެއްގައި މުޅިން އަލަށް ކުޅުނު ޖޯޖިއާ މުބާރާތުގެ ނޮކްއައުޓް ސްޓޭޖަށް ދަތުރު ކުރުމަކީ ގިނަ ބަޔަކަށް ހައިރާންކަމެއް ލިބުނު ކަމެކެވެ. އަދި ވަތުގަދަ ޕޯޗުގަލް އަތުން ދެ ލަނޑު ސުން ލަނޑުން މޮޅުވެ، ދެވަނަ ބުރުން ފުރުސަތު ލިބުމާއެކު ޖޯޖިއާގެ ކޯޗު ބުނެފައިވަނީ އެ ޓީމަށް ޔޫރޯ ކާމިޔާބު ކުރެވުން ފަދަ ކަމަށެވެ.
ޖޯޖިއާއިން މުބާރާތް ނިންމައި އެނބުރި ގައުމަށް ދިޔުމުން ހޫނު މަރުހަބާއެއް ކިޔާފައިވެއެވެ. ޓީމަށް މަރުހަބާ ކިޔުމަށް މަގުތައް މައްޗަށް އެތައް ހާސް ބަޔަކު ނުކުތްއިރު، ގއެ ހަރަކާތުގައި ޖޯޖިއާގެ ބޮޑު ވަޒީރު، އިރާކްލީ ކޮބަކިޑްޒޭވެސް ބައިވެރިވެވަޑައިގެންނެވިއެވެ.
ޔޫރޯގައި ޖޯޖިއާ ކުޅުނު ފުރަތަމަ މެޗުން، ތުރުކީ އަތުން ބަލިވި ނަމަވެސް ދެވަނަ މެޗުގައި ޗެކް ރިޕަބްލިކާ އެއްވަރުކޮށް އަދި ފަހު މެޗުގައި ޕޯޗުގަލް ބަލިކޮށް ދެވަނަ ބުރުން ފުރުސަތު ހޯދިއެވެ. ޖޯޖިއާ ކެޓީ ނޮކްއައުޓް ބުރުގައި ސްޕެއިން އަތުން ބަލިވެގެންނެވެ.
