ސަރުކާރު 100 އިންސައްތަ ހިއްސާވާ އާރުޑީސީން ހަރަދުކުޑަކުރުމުގެ ފިޔަވަޅުތަކެެއް އަޅަނީ ފައިދާވާ ކުންފުންޏަކަށް ހެދުމަށް ކަމަށް އާރުޑީސީން ބުނެއެވެ.
ހަރަދު ކުޑަކުރުމަށް އާރުޑީސީން އަޅާ ފިޔަވަޅުތަކުގެ ތެރޭގައި އިތުރު ގަޑީގައި މަސައްކަތް ކުރަންނުޖެހޭ ގޮތަށް މަސައްކަތް ރޭވުން ހިމެނެއެވެ.
ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ނަބީލު މުވައްޒަފުންނަށް ފޮނުވި އެންގުމުގައި ބުނެފައިވަނީ އޮފީސް ރަސްމީކޮށް ބަންދުކުރުމަށް ކަނޑައެޅިފައިވާ ގަޑި، ރޭގަނޑު 10:00 ގެ ކުރިން މަސައްކަތް ނިންމުމާއި އޭގެ ފަހުން ކޮންމެހެން ނިންމަންޖެހޭ މަސައްކަތެއް ކުރަންޖެހިއްޖެ ނަމަ އެ ދުވަހެއްގެ ރަސްމީ ގަޑި، ހަވީރު 4:00ގެ ކުރިން އެ ޑިޕާޓްމެންޓެއްގެ ސީނިއާ މެނޭޖަރު، އެޑްމިނިސްޓްރޭޝަން ޑިޕާޓްމެންޓުގެ ސީނިއާ މެނޭޖަރަށް އީމެއިލްކުރަންޖެހޭނެކަމަށެވެ. އަދި ދުރާލާ ހުއްދަ ނުހޯދައި އިތުރު ގަޑީގައި މަސައްކަތްކުރި ނަމަވެސް އެއްވެސް ފައިސާ އެޕްރޫވް ނުކުރަންވެސް ވަނީ އަންގާފައެވެ.
މީގެއިތުރުން އޮފީހުގެ ބަޖެޓުން ހަރަދުކޮށްގެން ކުރަންޖެހޭ ދަތުރުތަކުގެ ތެރެއިން ކޮންމެހެން ކުރަންޖެހޭ ދަތުރެއް ނޫނީ ނުކުރުމަށާއި އަދި މިފަދަ ދަތުރެއް ކުރަންޖެހިއްޖެ ނަމަ ވީހާ ވެސް ހަރަދު ކުޑަ ގޮތަކަށް ދަތުރުގެ އިންތިޒާމުތައް ހަމަޖެއްސުމަށްވެސް ވަނީ އަންގާފައެވެ. އަދި މިވަގުތަށް ކޮންމެންހެން ކުރަންޖެހޭ މަރާމާތުތައް ފިޔަވައި އިތުރު އެއްވެސް މަރާމާތެއް ނުކުރުންމަށްްވެސް ވަނީ އަންގާފައެވެ.
ހަރަދު ކުޑަކުރުމަށްް ފިޔަވަޅުތަކެއް އަޅާ އެކަން އާރުޑީސީން މުވައްޒަފުންނަށް އަންގާފައި މިވަނީ ރާއްޖޭގެ މާލީ ހާލަތު ގޯސްކަމަށްް ސަރުކާރުން ބުނަމުންދާ ދަނޑިވަޅެެއްގައެވެ. އަދި ހަރަދު ކުޑަކުރުމަށް ސަރުކާރުންވެސް ފިޔަވަޅުތަކެއް އަޅަން ނިންމާ އެކަން ވަނީ އިއުލާންކޮށްފައެވެ.
